Kólikpen soqtyǵysqan velosıpedshi kóz jumdy: Qaraǵandy oblysy

QARAǴANDY. QazAqparat - Qaraǵandy oblysynyń Saran qalasynda kólikpen soqtyǵysqan velosıpedshi araǵa úsh kún salyp qaıtys boldy, dep habarlaıdy QazAqparat tilshisi.

2021 jylǵy 26-27 mamyrǵa qaraǵan túni saǵat 1.20 shamasynda Qaraǵandy oblysynyń áskerı bólimderiniń biriniń kelisimshart boıynsha áskerı qyzmetshisi Saran qalasynda avtokólik júrgizip kele jatyp, velosıpedshini qaǵyp ketti. 30 mamyrda zardap shekken adam alǵan jaraqattary saldarynan kóz jumdy.

«Aldyn ala tekserý kórsetkendeı, velosıpedshi qozǵalys barysynda qarsy jolaqqa shyǵyp ketip, áskerı qyzmetshiniń kóligimen soqtyǵysqan.

Jedel járdem men polıtsııa shaqyryldy.

Kýálandyrý barysynda kólik júrgizgen áskerı qyzmetshiniń alkogoldik mas kúıi anyqtalǵan joq», - dep habarlady QR Qorǵanys mınıstrliginiń baspasóz qyzmeti.

Áskerı qyzmetshiniń osy oqıǵadaǵy kináliligi nemese kinásizdigi tergeý barysynda anyqtalatyn bolady.