Kólik tasymaldaýshylaryn salyqtan 3 jylǵa bosatý usynyldy

NUR-SULTAN. QazAqparat – Qazaqstanda áleýmettik mańyzy bar kólik tasymaldaýshylaryn qosylǵan qun salyǵynan 3 jylǵa bosatý usynylady. Bul usynys týraly Ulttyq ekonomıka mınıstri Rýslan Dálenov Salyq kodeksine ózgerister men tolyqtyrýlardy engizýdi kózdeıtin zań jobasyn senatorlarǵa tanystyrý barysynda aıtty, dep habarlaıdy QazAqparat tilshisi.

«Áleýmettik baǵyttar boıynsha tarıfterdiń tıimsiz bolýyna jáne sýbsıdııalaýǵa qarjynyń jetispeýine baılanysty tasymaldaýshylar shyǵynǵa ushyraıdy. Turaqty áleýmettik mańyzy bar avtokólik tasymaldary boıynsha qosylǵan qun salyǵynan 3 jylǵa bosatý usynylady. Teńiz kóligi arqyly tranzıtti damytý, tranzıt qunyn tómendetý úshin jaǵdaı jasaý maqsatynda júkti teńiz portyna deıin temir jol arqyly jetkizip, sý kóligine aýystyryp tıeý arqyly júrgiziletin tasymaldardy halyqaralyq dep taný jáne olarǵa qosylǵan qun salyǵynyń nóldik mólsherlemesin qoldaný usynylady», - dedi Rýslan Dálenov Parlament Senatynyń otyrysynda.

Onyń aıtýynsha 5G jańa baılanys túrin qurýǵa ınvestıtsııa tartyp, jasandy ıntellektti damytý maqsatynda radıojıilik spektrin paıdalanǵany úshin tólemaqy mólsherlemelerin 5 jyl merzimine 10 esege deıin tómendetý usynylady.

Sonymen qatar, jeke tulǵalarǵa qyzmetteri men taýarlaryn elektrondy túrde ótkizetin sheteldik ınternet-kompanııalar qosylǵan qun salyǵyn tóleýge mindetti bolady.