Kólik prokýratýrasy temirjolmen jolaýshy tasymaldaýǵa qatysty mınıstrdiń buıryǵyna narazylyq keltirdi

ASTANA. QazAqparat - Kólik prokýratýrasy t/j kóligimen jolaýshylardy tasymaldaý Qaǵıdalaryna qatysty Mınıstrdiń buıryǵyna narazylyq keltirdi, dep habarlaıdy QazAqpara QR Bas kólik prokýratýrasynyń baspasóz qyzmetine silteme jasap.

Baspasóz qyzmetiniń málimetterine qaraǵanda, kólik prokýratýrasy josparly taldaý nátıjeleri boıynsha Investıtsııalar jáne damý mınıstriniń 2015 jyldyń 30-sáýirdegi «Temirjol kóligimen jolaýshylardy, bagajdy, júk-bagajyn jáne poshta jóneltilimderin tasymaldaý qaǵıdalaryn bekitý týraly» buıryǵyna narazylyq keltirdi.

Osy Qaǵıdalarǵa sáıkes 15 jáne jasy odan asqan balalar «QTJ «UK» AQ-yń qyzmetterin zańdy ókilden notarıaldy kýálandyrylǵan jazbasha kelisim men senimhat bolǵan jaǵdaıda ǵana derbes paıdalana alatyny anyqtaldy.

Bul norma Azamattyq kodekske jáne «Notarıat týraly» Zańǵa sáıkes «kelisimdi» kýálandyrý men «senimhat» berý eki óz aldyna bólek notarıattyq is-áreket ekeni eskerilmegen.

Bul erejelerdi qoldaný monıtorıngi kórsetkendeı, jolserikter Qaǵıdalarǵa silteme jasap, bundaı jolaýshylar saparǵa jiberilmeı nemese olardy qozǵalys barysynda alynyp tastalynǵan jaǵdaılar bolǵan.

Búgingi tańda Indýstrııa jáne ınfraqurylymdyq damý mınıstrligi prokýratýranyń narazylyǵyn tolyq kólemde qanaǵattandyrdy jáne «QTJ «UK»AQ bir ǵana qujattyń (notarıaldy kýálandyrylǵan kelisim) bolýy boıynsha osyndaı qyzmetter kórsetý týraly nusqaý berdi.

«Sonymen birge ýákiletti organ Jolaýshylardy t/j kóligimen tasymaldaý jónindegi Qaǵıdalarǵa tıisti túzetýler engizý jáne jalpy ony jetildirý jumystaryn jalǵastyrýda»,-delingen Bas kólik prokýratýrasynyń habarlamasynda.