Kólik polıtseıleri tyl ardageri Vıktor Smolıakovty Jeńis kúnimen quttyqtady
Kóliktegi polıtsııa departamenti bastyǵynyń orynbasary, polıtsııa polkovnıgi Ońal Bekeev pen Ardagerler keńesiniń tóraǵasy E.J. Shaımerdenov UOS jyldarynda tylda eńbek etken Vıktor Smolıakovty úıine baryp quttyqtady.
Qazir tyl eńbekkeri 85 jasta. Ol zaıyby Nına Safronovamen birge Nur-Sultan qalasynda turady. Otaý qurǵandaryna 60 jyl bolǵan qarııalar nemere-shóbere súıip otyr. Vıktor Petrovıch - úlken otbasynyń úlgi tutar maqtanyshy.
Qonaqtar ardagerdi kele jatqan Jeńis kúni jáne Otan qorǵaýshylar kúnimen shyn júrekten quttyqtap, gúl, azyq-túlik sebeti men teledıdar syılady. Ardagerler keńesiniń tóraǵasy Esbolat Sháımerdenov aqshalaı materıaldyq kómekti tabys etti.
Ońal Bekeev departament bastyǵynyń atynan Vıktor Petrovıchke tyldaǵy eseli eńbegi men erligi úshin alǵys aıtyp, zor densaýlyq pen uzaq ómir tiledi.
«Otan aldyndaǵy eńbegińizdi eshqashan umytpaımyz. Sizderdiń maıdanda jáne tylda jasaǵan erlikterińiz búgingi jas urpaqqa úlgi bolyp qala bermek», - dedi ol.
Shynynda da, surapyl soǵys tyl eńbekkerlerinen asqan jankeshtilikti talap etti. Vıktor Smolıakov tańerteńgilik ertemen anasy ekeýi qalyń qardy ombylap, soqpaq jolmen jumysqa attanatynyn áńgimeledi.
«Jumysqa barǵan jolymyzdy keshke biz qaıtqan ýaqytqa deıin qaıta qar basyp qalatyn», - deıdi qarııa.
Sol kezdegi 6 jasar Vıtıa anasynyń qala shetinde ornalasqan mal fermasyndaǵy jumysyna kómektesti. Malǵa shóp, saban tasyp, ony ózderi arbadan túsirip, jınap álek bolatyn. Ashqursaq ári sýyqta tońa júrip, qoldan kelgenshe maıdanǵa bárin jiberýge tyrysty. Tipti, ol jeńisti sarǵaıa kútkenin kózi móltildeı otyryp, esine aldy.
1958 jyly Keńes Armııasynda boryshyn ótegennen keıin týǵan jeri - Qazaqstanǵa oraldy. Sóıtip, óziniń eńbek jolyn ishki ister organdarynan bastady.
Vıktor Petrovıch 20 jyl boıy Kóliktegi ishki ister organdarynda jumys istedi. Qyzmet etken jyldarynda minsiz qyzmeti úshin ІІO-daǵy barlyq dárejedegi medaldarmen, «Mılıtsııa úzdigi» belgisimen jáne kóptegen mereıtoılyq medaldarmen marapattalǵan.
1991 jyldyń naýryz aıynda zeınetke shyqty. Otstavkadaǵy polıtsııa polkovnıgi Kóliktegi ІІO ardagerleriniń múshesi.
Qonaqtar keter aldynda Vıktor Petrovıchpen estelik sýretke tústi. Óz kezeginde ol Departament basshylyǵyna jáne óz áriptesterine qamqorlyq jasap, quttyqtaǵandaryna sheksiz alǵysyn bildirdi. Sondaı-aq qurmetti ardager óz áriptesterin Otan qorǵaýshylar kúnimen quttyqtap, uzaq ómir men otbasylyq baqyt tiledi.