Kólik polıtseıleri kóktemniń qos merekesin atap ótti

ASTANA. QazAqparat - Kóliktegi polıtsııa departamentiniń qyzmetkerleri Naýryz meıramy men Qazaqstan halqynyń birligi kúni merekelerin atap ótti. Kólik polıtseıleri Astana qalasy áýejaıyndaǵy Jelilik polıtsııa bóliminiń alańyna 5 kıiz úı tigip, ulttyq taǵamdarǵa toly dastarhan jaıdy. Oǵan ІІM ókilderi, ІІO ardagerleri, Qazaqstan halqy Assambleıasynyń músheleri, sondaı-aq áýe jáne temirjol uıymdarynyń qyzmetkerleri qatysty, dep habarlaıdy QazAqparat Kóliktegi polıtsııa departamentiniń baspasóz qyzmetine silteme jasaı otyryp.

Merekelik is-sharany alǵy sózben ashqan Departament bastyǵy Baqytjan Malybaev qatysýshylardy qos merekemen quttyqtady.

«Halqymyz ejelden bereke-birlikti: «Yrys aldy – yntymaq», - dep dáriptegen. Bul, eń aldymen, tabıǵattyń jańarýynyń, qoǵamdaǵy beıbitshilik pen kelisimniń merekeleri. Sondyqtan bul meıramdardyń biz úshin oryndary erekshe», - dedi polıtsııa polkovnıgi. Budan soń ol jınalǵandarǵa zor densaýlyq, eńbekterine tabys, shańyraqtaryna baıandy baqyt tiledi.

Aıtýly merekelerdi polıtseıler dástúrli túrde jyl saıyn atap ótedi. Bul kúni tártip saqshylary polıtsııa formasyn qazaqtyń ulttyq kıimderine aýystyryp, merekege qurmet kórsetedi. Uıymdastyrýshylar mundaı is-sharalardyń ujymda jaǵymdy moraldyq-psıhologııalyq ahýaldy qalyptastyrýda yqpaly zor ekendigin aıtty.

«Birlik», «Yntymaq», «Dostyq» jáne «Turan» atty tórt aýyldan quralǵan Departament apparatynyń qyzmetkerleri ózara saıysqa tústi. Olar komıssııa músheleri men qonaqtarǵa «Syrǵa salý», «Betashar» «Besikke salý» jáne «Tusaý kesý» sııaqty kóshpendi qazaq halqynyń salt-dástúrlerin kórsetti.

Alańda tigilgen aqshańqan qazaq úıler merekelik sharanyń kórkin ashty. Qatysýshylar halqymyzdyń turmys-tirshiliginde paıdalanǵan zattardy tamashalap, ulttyq taǵamdar men Naýryz kójeden dám tatty. Altybaqan teýip, án saldy, bı bıledi.

Merekelik basqosýda elimizdi mekendeıtin túrli ulttar men ulystardyń da bıleri bılenip, ánderi shyrqaldy. Tipti polıtseıler ulttyq sport túrleri sanalatyn «arqan tartý», «gir tasyn kóterý», «qol kúres», «asyq atý» jáne t. b. jarystarǵa qatysyp, óz kúshterin synady.

Úzdik teatrlandyrylǵan nómirler men sporttyq jarystardyń jeńimpazdary Departament bastyǵynyń gramotalary jáne alǵys hattarymen marapattaldy. Sonymen qatar, «Úzdik kıiz úı», «Úzdik ulttyq kostıým» jáne «Úzdik dastarhan» syndy nomınatsııalar boıynsha túrli marapattar tabys etildi.