Kólik polıtseıleri 47 zańsyz taksı júrgizýshisin ákimshilik jaýapkershilikke tartty
Qańtar aıynyń basynan beri elimizdiń áýe jáne temirjol kóligi nysandarynda, qoǵamdyq oryndarda adamdardyń mazasyn alyp tıiskeni úshin 196 adam ákimshilik jaýapkershilikke tartyldy, onyń ishinde 47 zańsyz taksı júrgizýshisi bar.
Kóliktegi polıtsııa departamenti ákimshilik polıtsııa basqarmasynyń bastyǵy Dáýlet Moldahanovtyń aıtýynsha, reıd júrgizý barysynda jelilik polıtsııa bóliminiń qyzmetkerleri Astana qalasy áýejaıyndaǵy qoǵamdyq oryndarda tıisý faktisin anyqtady.
«Kólik polıtseıleri tekserý kezinde áýejaı termınalynda jolaýshylardyń mazasyn alyp, jeke tasymaldaý qyzmetin usynyp júrgen 29 jastaǵy elorda turǵynyn anyqtap, ustady. Er adam birneshe ret eskertýdi elemeı, tipti polıtsııa bólmesine jetkizý kezinde qashyp, polıtsııa qyzmetkeriniń zańdy talaptaryna baǵynbaǵan. Quqyq buzýshyǵa qatysty QR ÁQBtK-niń 449-baby 1-bóligi jáne QR ÁQBtK-niń 667-baby 1-bóligi boıynsha eki ákimshilik hattama toltyryldy jáne baǵynbaý boıynsha materıal sotqa jiberildi», - dedi D. Moldahanov.
Kólik polıtseıleri eskertedi: qoǵamdyq oryndarda tıisý boıynsha birinshi ret ákimshilik quqyq buzýshylyq jasaǵany úshin jeke tulǵalarǵa eskertý jasaýǵa ne 5 aılyq eseptik kórsetkish (17 250 tg) mólsherinde aıyppul salýǵa ákep soǵady. Al, quqyq qorǵaý organy qyzmetkeriniń zańdy talabyna baǵynbaý 30 aılyq eseptik kórsetkish (103 500 tg) mólsherinde aıyppul salýǵa ne 15 táýlikke deıingi merzimge ákimshilik qamaýǵa alýǵa ákep soǵady.