Kólik nomerin ózgertip alǵan túrkistandyqtyń aıyppulyn ózge adam tólegen
22:07, 17 Tamyz 2022
TÚRKІSTAN. QazAqparat - Qolymen kólik nomerin ózgertken túrkistandyq júrgizýshiniń kesiren Saryaǵash turǵyny 90 myń teńge aıyppul tóleýge májbúr bolǵan, dep habarlaıdy QazAqparat tilshisi.
«Mercedes» markaly kóliktiń júrgizýshisi memlekettik tirkeý nomerindegi 1 áripti qoldan ózgertip alǵan. Sodan jol erejesin buzýyna qatysty aıyppuldar ózine emes, Saryaǵash turǵynyna joldanyp kelgen. Aıyppuldyń deni jyldamdyq shekten tys asyrylǵany úshin salynǵan.
Saryaǵashtyq turǵyn Túrkistan oblysy Polıtsııa departamentiniń Jedel basqarý ortalyǵyna habarlasyp, aryz túsirgen. Sonyń negizinde izdeý sharalary júrgizilip, kúdikti kólik Túrkistan qalasynan tabyldy. Jalǵan nómir taqqan kólik Ámir-Temir kóshesinde toqtatylyp, QR ÁQBtK-niń 590-baby 1-bóligi «Kólik quraldaryn paıdalaný qaǵıdalaryn buzý» boıynsha ákimshilik hattama toltyryldy. Kólik aıyp turaǵyna jetkizildi.