Kólik komıtetiniń shtat sanyn ulǵaıtpaımyz – Roman Sklıar

ASTANA. QazAqparat – Indýstrııa jáne ınfraqurylymdyq damý mınıstrliginiń Kólik komıtetinda qyzmetkerlerdiń shtat sany ulǵaıtylmaıdy. Májilis depýtattarynyń saýalyna bergen jaýabynda Premer-Mınıstrdiń birinshi orynbasary Roman Sklıar osyndaı ustanymyn aıtty, dep habarlaıdy QazAqparat tilshisi.

«Búgingi tańda komıtettiń shtat sany – 115 birlik. Kóliktik baqylaý ınspektsııasy jáne porttardyń teńiz ákimshiligi – 449 birlik. Abaı, Jetisý jáne Ulytaý oblystarynyń jańa ınspektsııalarynyń qurylýyna baılanysty kóliktik baqylaý ınspektsııalarynyń jalpy sany 31 birlikke ulǵaıtyldy», - delingen jaýapta.

Vıtse-Premerdiń aıtýynsha, komıtetke jetispeıtin adamnyń ornyn tsıfrlyq tehnologııalardyń kómegimen toltyrý kerek.

«Bul rette, sybaılas jemqorlyq táýekelderin boldyrmaý úshin kóliktik baqylaýdy júzege asyrýǵa adamı faktordyń qatysýyn barynsha azaıtý úshin kólik salasyn tsıfrlandyrý júrgizilýde. Osylaısha, avtomattandyrylǵan ólsheý stantsııalary avtojoldarda quqyq buzýshylardy ákimshilik jaýapkershilikke avtomatty túrde, adamnyń qatysýynsyz tarta alady. Sondaı-aq jolaýshylardy, júkterdi jáne qaýipti júkterdi tasymaldaýdy qashyqtyqtan baqylaý men monıtorıngteý engiziledi. Osyǵan baılanysty Komıtet qyzmetkerleri sanynyń qosymsha ósýi qaralmaıdy», - dep jazdy Roman Sklıar.