Kólik qaýipsizdigi qujattaryn zańsyz bergen sertıfıkattaý organdary jaýapqa tartyldy – mınıstrlik

ASTANA. QazAqparat – Saýda jáne ıntegratsııa mınıstrligi Tehnıkalyq retteý jáne metrologııa komıtetiniń tóraǵasy Qýanysh Elikbaev bıylǵy 10 aıdaǵy memlekettik baqylaýdyń negizgi nátıjelerin aıtty, dep habarlaıdy QazAqparat tilshisi.

Komıtettiń aýmaqtyq departamentteri 2022 jyldyń 10 aıynda 1326 memlekettik tekserý jasaǵan.

«Barlyq tekserýlerdiń 65% nemese 865 jaǵdaıda buzýshylyqtar anyqtalǵan. 122 uıǵarym berilip, ákimshilik quqyqbuzýshylyq is boıynsha 155 qaýly shyǵaryldy. Ákimshilik aıyppuldar somasy – 140,6 mln teńge, bul 2021 jylmen salystyrǵanda 77%-ǵa artyq», - dedi Qýanysh Elikbaev Ortalyq kommýnıkatsııalar qyzmetinde ótken baspasóz máslıhatynda.

Sonymen birge, 70 akkredıtteý sýbektisi tekserilip, 55%-ynda nemese 39-ynda buzýshylyqtar anyqtaldy. Olarǵa 2,4 mln teńge aıyppul salyndy.

«Bul buzýshylyqtar úshin birqatar zerthana men sertıfıkattaý organdarynyń – «Petroekspertıza» JShS, Qostanaı qalasyndaǵy «Aktsent» kompanııasy» JShS, «Polısertıko» JShS, Qostanaı qalasyndaǵy «Dıagnostıka KST-2012» JShS akkredıtteý attestaty 6 aıǵa toqtatyldy, olardyń bir bóligi zańdy quqyǵyn paıdalanyp, sotta daýlasyp jatyr. Mysaly, Petropavlda «Petroekspertıza» JShS avtokólik quraldaryn qaıta jabdyqtaý kezinde synaq júrgizbeı 50 qujat bergen», - dedi spıker.

Onyń aıtýynsha, osyndaı baǵalaý júrgizetin birneshe sarapshy-aýdıtorlardyń attestattary toqtatylyp, 1,1 mln teńge ákimshilik aıyppul salyndy.