Kólik alý baǵdarlamasyna qatysyp jatqandardyń ótinimderi qaı jaǵdaıda qabyldanbaıdy

ASTANA. QazAqparat – Kólik alýǵa jeńildikpen nesıe berý baǵdarlamasyna qatysyp jatqan adamdaryń ótinimderi úsh jaǵdaıda qabyldanbaıdy, dep habarlaıdy QazAqparat tilshisi.

«Ótinimdi tekserýge tıisti ýaqyt kerek bolady. Osydan keıin saıttaǵy «jeke kabınette» ótinim maquldanyp, baǵdarlamaǵa qatysatyndar pýlyna adamnyń qosylǵany týraly habarlama keledi. Sonymen qatar, adamdaryń ótinimderi úsh sebep boıynsha qabyldanbaýy múmkin. Birinshiden, osyǵan deıin baǵdarlama aıasynda nesıe alsa, bul adamnyń ótinimi qabyldanbaıdy. Ekinshiden, platformada osy adamnyń ótinimi buǵan deıin engizilip, qarastyrý kezeńinen ótip jatsa, jańa ótinimdi qosý múmkindigi bolmaıdy. Úshinshiden, baǵdarlamaǵa qatysyp jatqan bankte qarajat lımıti taýsylsa, ótinim qabyldanbaıdy», - dedi «Ónerkásipti damytý qory» AQ basqarma tóraǵasynyń orynbasary Rınat Gapparov.

Osy oraıda ol bir adam eki jylda bir ret jeńildetilgen nesıeni ala alatynyn aıtty.

R. Gapparovtyń sózine qaraǵanda, avtokólik pen nesıeni berýdiń tolyq rásimin 60 kúnniń ishinde aıaqtaý kerek.

«Osy rásimnen atalǵan merzimde óte almaǵandar pýldan shyǵarylyp, ótinimdi qaıtadan berýi kerek. Atap aıtqanda, ótinimi maquldanǵan adamdar tólem shotyn alý úshin avtosalonǵa baryp, keıin banktegi qujattardy rásimdeýi tıis», - dedi ol.

Budan buryn habarlanǵandaı, bıylǵy 6 aqpanda «Ónerkásipti damytý qory» AQ («Qazaqstannyń Damý Banki» AQ enshiles uıymy) kólik alýǵa jeńildikpen paıyzy tómen nesıe berý baǵdarlamasy boıynsha ótinimderdi qabyldaý úshin jańa platformany iske qosady.

Ótinimderdi qabyldaý Astana ýaqyty boıynsha saǵat 10:00-de www.autonesie.kz resmı saıty arqyly júrgiziledi. Osy oraıda bul platforma kelesi aptada iske qosylǵan kezde 761 adam tirkele alady