Kóligin urlatqan azamattar oǵan salyq tóleýden bosatylýy múmkin
Aıta keterligi, otyrysta elimizdiń Ulttyq ekonomıka mınıstri Tımýr Súleımenov jańa Salyq kodeksiniń jobasyn tanystyrǵan bolatyn. Osy rette depýtat Pavel Kazantsev avtomobılin urlatqan azamattardyń kólikti paıdalanbasa da salyq tóleıtindigin aıtyp, atalǵan problemany sheshý joldary jańa Kodekste kórsetilgendigin ne kórsetilmegendigin suraǵan bolatyn.
«Oılap kórińizdershi, mundaı jaǵdaıda salyq tóleýshi paıdalanbaıtyn avtomobıl úshin salyq tólemeýi kerek qoı. Qazirgi ýaqytta kóligi urlanǵan jaǵdaıda ıesi aldymen polıtsııaǵa, aryz jazyp, odan keıin salyqtan bosaý úmitimen salyq qyzmetine júginip jatady. Alaıda salyq organy ony salyq tóleýden bosata almaıdy. Óıtkeni avtomobıldi tirkeýden shyǵarý qajet. Al kólik urlansa da zańdy túrde ıesiniń atynda turǵandyqtan tirkeýden shyǵarý múmkin emes. Sońynda tuıyqtalǵan sheńber bolyp shyǵady. Іs júzinde avtomobıldi jyldar boıy izdeýi múmkin. Al salyqty tóleýge týra keledi», - dedi depýtat.
Osy máselege baılanysty pikir bildirgen QR Іshki ister mınıstri Erlan Turǵymbaev ondaı normanyń kodekste bar ekendigin aıtty.
«Іs júzinde mundaı norma bar. Sońǵy 5 jyldyń ishinde urlanǵan 7751 avtomobıl áli tabylǵan joq», - dedi ol.
Atalǵan máselege Májilis tóraǵasy Nurlan Nymatýlın de pikir bildirip, kólik tabylǵanǵa deıin onyń ıesin salyqtan bosatý jón bolatyndyǵyn basa aıtty.
«Máselen, polıtsııa organdary kólik ıesiniń aryzy negizinde avtomobıldiń urlanǵandyǵy týraly sáıkesinshe anyqtama berse durys bolar edi. Al salyq organdary avtomobıl izdeýde bolǵan kezde kólik ıesin salyqtan bosatýy qajet», - dedi Májilis spıkeri.