Kóligin satyp, balalardy halyqaralyq jarysqa aparǵan bapkerdiń qyzy chempıon boldy

<p>PAVLODAR. KAZINFORM - Ekibastuzdyq alty jasar Hadııa Qunaeva djıý-djıtsýdan Ábý-Dabıde ótken halyqaralyq dodada KIDS 2 sanatynda mereıi ústem bolyp, álem chempıony atandy. Fınaldyq kezdesýde jetkinshek Birikken Arab Ámirliginiń ókilinen basym tústi.&nbsp;</p>

Chempıon qyzdy ákesi jattyqtyrady. Bul otbasynda Hadııadan bólek taǵy bes bala djıý-djıtsýmen shuǵyldanady. Olardyń barlyǵy ákesiniń tálimin alyp júr.

Foto: Samat Qunaevtyń jeke muraǵatynan

42 jasar Samat Qunaevtyń ózi djıý-djıtsýmen aınalysa bastaǵanyna birneshe jyl ǵana bolǵan. Ol sportqa kelgeli densaýlyǵy durystalǵanyn aıtady. Kóptegen álem chempıonatyna qatysyp úlgergen. Otaǵasy búginde grepplıngten Qazaqstannyń sport sheberi. Ákesiniń jetistigi balalaryn shabyttandyryp, búginde jeteýiniń altaýy onyń jolyna túsken.

- Kenje balam úsh jarymda, oǵan sportpen shuǵyldanýǵa áli erte. Al Hadııam sportpen aınalysyp júrgenine eki jyldaı boldy. Ol buǵan qosa erkin kúresten de jattyǵady. Álem chempıony atanýǵa kúrestiń de paıdasy tıdi dep oılaımyn. Ózim Abý-Dabıde ótetin halyqaralyq týrnırge 2021 jyldan qatysyp, úsh jyl qatarynan júldeger bolsam, bıyl birinshi oryndy ıelendim, - deıdi Hadııanyń ákesi.

Foto: Samat Qunaevtyń jeke muraǵatynan

Samat Nurtaıuly búginde balalardy djıý-djıtsýge baýlyp júr. Óz balalarynan bólek, Ekibastuz boıynsha 100-deı bala onyń tálimin alýda. Abý-Dabıdegi týrnırde qyzy Hadııamen qosa, bapkerdiń jattyǵýlaryna qatysyp júrgen shákirtteri – 8 jasar Sırın álem chempıony atansa, 13 jasar Salsabıl úshinshi orynnan kórindi.

Foto: Samat Qunaevtyń jeke muraǵatynan

Bul týrnırge balalardy aparyp qatystyrý úshin Samat Qunaev óziniń jeke avtokóligin satyp jibergen. Aqshanyń kóp bóligi ushaqpen ushýǵa, jatar orynǵa ketkenin aıtady.