Kóligime otyrǵandar únemi aq jol tileıdi - Óskemendegi taksıshi qyz

<p>ÓSKEMEN. KAZINFORM &ndash; VAZ-2114 kóligin el arasynda &laquo;14&raquo; dep ataıdy. Óskemende osy kólikpen júıtkip júrgen jas qyzdy kórgenderdiń bári tańyrqap jatady. Ol taksıshi retinde tapsyrysqa kelgende jolaýshylar suraqty qarsha boratady. Buǵan Aqjarqyn Zıkenovanyń eti ábden úırengen. &nbsp;</p>

Aqjarqyn 2002 jyly Marqakól aýdanynda týǵan. Kólikke bala kúninen qyzyqqan.

- Ákemniń qyzymyn. Úıde ekinshi balamyn. Aǵamnyń kólikke degen qyzyǵýshylyǵy múlde joq. Alǵashqy temir tulparyn tek 24 jasynda aldy. Al men bolsam kerisinshe qarshadaıymnan kólikke otyrdym. 17 jasymda mehanıkalyq kólik júrgizýdi úırenip aldym. Ákemde Mitsubishi, aǵamda VAZ-2114 kóligi boldy. Aǵamnyń qara tústi 14 kóligin aýylda 2 jyldaı aıdap júrdim. Sebebi nege ekenin bilmeımin, Mitsubishi-ge qaraǵanda VAZ-2114-ti júrgizgen unaıtyn, - deıdi ol.

Aqjarqyn Zıkenovanyń Óskemenge kóship kelgenine 2 jyldaı ýaqyt boldy. 2023 jyldyń aqpan aıynda óziniń tuńǵysh kóligin aldy. Dál aǵasyniki sekildi VAZ-2114. Biraq aq tústi.

- Basynda ákem 14 kóligin alýyma qarsy boldy. «Qyzym, bul saǵan aýyl emes. Qalada mehanıkalyq kólik aıdaǵan qıyn», - dedi. Sonda da aıtqanymnan qaıtpadym. Áıteýir ákem jibip, óz kelisimin berdi, - deıdi keıipkerimiz.

Qazir Aqjarqyn bir emes, úsh túrli jumys isteıdi. Eń negizgisi – Q.Nurǵalıev atyndaǵy kolledjde master. Dál osy oqý ornynda tehnolog-kondıtershi mamandyǵyn támamdaǵan. Stýdentterge kondıterlik ónimderdi pisirýdi úıretedi. Ekinshi jumys retinde úıde tort pisirip satady. 

- 16 jasymnan beri tort pisirip, satyp kelemin. Marqakól aýylynda bári maǵan tapsyrys beretin. Qalaǵa kelgennen keıin de bul isimdi jalǵastyrdym. Toı-tomalaqqa shaı dastarhanyn daıyndaımyn. Al úshinshi jumys retinde taksı júrgizýshisi bolyp, klıent tasımyn. Kóligime otyrǵandardyń bári tańǵalady. «Qyzsyń ári jassyń. Qalaı qoryqpaısyń?» deıdi. Túserde klıentterim únemi aq jol tileıdi. Keıbiri aqshamdy artyǵymen beredi. Otyrmaı qoıatyn adam bola ma eken dep kútip júrdim. Alaıda ondaı bolyp kórgen emes, - deıdi Aqjarqyn Zıkenova.

Kóligin ózi tort satyp jınaǵan aqshasyna alǵan. Jetpeı turǵan somany nesıe arqyly qosty. Taıaýda sol nesıeni de tolyqtaı jaýyp tastady. «14-ti satyp basqa kólik alý oıda bar ma?» degen suraǵyma ol:

- Joq. Bul meniń súıikti kóligim. Satqym kelmeıdi. Onyń ústine TikTok jelisinde «14-pen júretin Zıkenova» degen atpen vıdeoblog júrgizemin. 45 myńǵa jýyq jazylýshym bar. Vıdeolarym birneshe mln kórilim jınap jatady. Kólik júrgizýshilerine ózimniń aqyl-keńesterimdi aıtamyn. Kólikti ózim jóndeı almaımyn. Biraq qaı jeri synǵanyn shyqqan daýystan-aq ajyratamyn. Ár bólshek-saımanynyń atyn jatqa bilemin. ıAǵnı, kólik jóndeıtinder meni aldaı almaıdy, - deıdi taksıshi qyz.

14-pen zýyldap júrgen Aqjarqyndy kórgen polıtseıler de tańdanysyn jasyrmaıdy. Keıde usaq-túıek jol erejesin buzǵanyn baıqasa, aýyzsha eskertý jasap qoıa beredi eken. Birde jol saqshysy ony toqtatyp alyp, «Ereje buzyp aldym ba?» degen arýdyń suraǵyna «Jyldamdyqty emes, ádemilikti asyryp jiberdińiz» degen eken.

- Osy múmkindikti paıdalanyp 8 naýryz merekesimen áıelder qaýymyn quttyqtaǵym keledi. Bul dúnıede áıel zatynsyz eshteńeniń máni joq. Biz ádemiliktiń, náziktiktiń sımvolymyz. Sol úshin er adamdar qyzdardy baǵalap, aıalap, qurmettese eken, - deıdi Aqjarqyn.