Kóleńkeli ekonomıkamen kúres: Mıkroqarjy uıymdary qosymsha málimetterdi usynýǵa mindetteldi
Bul týraly QR Qarjy naryǵyn retteý jáne damytý agenttiginiń Tóraǵasy Mádına Ábilqasymova Úkimet otyrysynda aıtty.
«2017 jyly zańdy tulǵalar arasyndaǵy eń tómen eseptik kórsetkishtiń myń eselengen mólsherinen joǵary somaǵa mámileler boıynsha barlyq esep aıyrysý qolma-qol aqshasyz nysanda júzege asyrylýǵa tıis degen zańnamalyq talap engizildi. 2020 jylǵy sáýirde Ulttyq Bank pen Agenttik zańdy tulǵalardyń bank shottarynan qolma-qol aqshany alý somalarynyń shekti mólsherin belgileıtin qaýlyny qabyldady. Qolma-qol aqshasyz aınalymdy keńeıtý úshin 25 maýsymda Memleket basshysy tsıfrlyq tehnologııalardy retteý máseleleri boıynsha Qazaqstan Respýblıkasynyń Zańyna qol qoıdy, onda jyljymaıtyn múlikpen mámileler boıynsha esep aıyrysýdy tek qolma-qol aqshasyz nysanda júrgizý qajettiligi týraly talap kózdelgen. Atalǵan sharalardy iske asyrý úshin agenttik bankter klıentteriniń qolma-qol aqshany paıdalaný boıynsha belgilengen normalardy saqtaýyna monıtorıng júrgizedi», - dedi agenttik basshysy.
M. Ábilqasymova sondaı-aq kiristerdi jylystatýǵa jáne terrorızmdi qarjylandyrýǵa qarsy is-qımyl boıynsha zańnamaǵa sáıkes derbes derekterdi ıdentıfıkatsııalaý jáne qujattarmen rastaý úshin bank bólimshesinde klıenttiń mindetti túrde bolýy talap etilgenin habarlady.
«Agenttik atalǵan talaptardy qaıta qarady, klıentterdi qashyqtan tekserý tártibi jeńildetildi. Endi azamattar bank shotyn bankterdiń bólimshelerine barmaı, elektrondyq tsıfrlyq qoltańbany, bıometrııa quraldaryn nemese tólem kartochkasynyń derektemelerin paıdalaný arqyly asha alady. Búgingi kúni 13 bank bank shotyn qashyqtan ashady, olarǵa jeke tulǵalardyń bank shotynyń 99% jatady. Bankterdiń 90% qyzmetterin ınternet jáne mobıldi bankıng arqyly kórsetedi. 2020 jyldyń basynda 30 mln astam tólem kartochkasy aınalymda. Sońǵy 5 jylda onlaın tranzaktsııalar sany 56 mln operatsııadan 992 mln operatsııaǵa deıin ósti, al ınternet-resýrstar men mobıldik telefondardy paıdalaný arqyly jasalǵan operatsııalar kólemi 2019 jyly 8,1 trln teńge boldy», - deıdi M. Ábilqasymova.
Mádına Ábilqasymovanyń aıtýynsha, Qazaqstan Respýblıkasynyń Aqshany jylystatýmen kúrestiń qarjylyq sharalaryn ázirleý tobynyń (FATF) qatysýshysy bola otyryp, qarjy naryǵynyń barlyq sýbektileriniń kiristerdi jylystatýǵa jáne terrorızmdi qarjylandyrýǵa qarsy is-qımyldyń halyqaralyq standarttaryn saqtaý boıynsha mindettemeleri bar.
«Qazirgi ýaqytta bankter jáne saqtandyrý uıymdary bul talaptar men standarttardy tolyq kólemde saqtaýda, al mıkroqarjy uıymdarynyń jáne baǵaly qaǵazdar naryǵyna kásibı qatysýshylardyń qyzmeti rettelmegen bolatyn. Osyǵan baılanysty Agenttik baǵaly qaǵazdar naryǵyna kásibı qatysýshylardy jáne mıkroqarjy uıymdaryn olardyń kiristerdi jylystatýǵa jáne terrorızmdi qarjylandyrýǵa qarsy is-qımyl salasyndaǵy zańnamany saqtaý týraly málimetterdi usynýyn mindetteıtin qaýlyny qabyldady», - dep túsindirdi agenttik basshysy.
M. Ábilqasymovanyń derekteri boıynsha, 2020 jylǵy qańtar-mamyrda kiristerdi jylystatýǵa jáne terrorızmdi qarjylandyrýǵa qarsy is-qımyl (KJ/TQQ) boıynsha zańnamanyń talaptaryn buzý faktileri boıynsha bankterge qatysty ákimshilik quqyq buzýshylyq týraly 81 hattama jasaldy, jalpy somasy 6 400 AEK aıyppul salyndy, baǵaly qaǵazdar naryǵyna kásibı qatysýshylarǵa qatysty 77 hattama jasaldy jáne jalpy somasy 9 181 AEK aıyppul salyndy, saqtandyrý uıymdaryna qatysty ákimshilik quqyq buzýshylyq týraly 37 hattama jasaldy.
Kóleńkeli ekonomıkany tómendetýdiń júıelik sharasy retinde agenttiktiń quqyq qorǵaý organdarymen jáne qarjy monıtorıngi komıtetimen jedel ózara is-qımyl jasaýy rettelgen.
Vedomstvoaralyq úılestirýdi jáne jan-jaqty qadaǵalaýdy kúsheıtý úshin qarjy monıtorıngi komıteti, agenttik jáne Ulttyq bank arasynda úshjaqty kelisim ázirlendi.