Kóleńkeli ekonomıka deńgeıi 20% tómen bolýy tıis – Premer-Mınıstr
«Qurmetti áriptester! Qazirgi ekonomıkalyq jaǵdaıda ekonomıkany turaqtandyrýdy qamtamasyz etý men bıýdjet kirisin tolyqtyrý rezervteriniń biri – kóleńkeli ekonomıka úlesin qysqartý bolyp otyr. Osy baǵytta qabyldanyp jatqan sharalar oń nátıje berýde. 2025 jylǵa qaraı kóleńkeli ekonomıka úlesin JІÓ 20 paıyzynan tómen deńgeıge jetkizý josparlanǵan», - dep atap ótti Premer-Mınıstr Úkimettiń kezekti otyrysynda.
Osy baǵytta júrgizilgen jumys nátıjesinde jalpy ishki ónimmen salystyrǵandaǵy kóleńkeli ekonomıka úlesi 2017 jylǵy 27 paıyzdan 2019 jyly 23,6 paıyzǵa deıin qysqartyldy. Bul bıýdjettiń kiris bóliginiń qosymsha 1,5 trln teńge artýyn qamtamasyz etti.
«Halyqaralyq valıýta qorynyń dereginshe, álemdegi kóleńkeli ekonomıkanyń ortasha deńgeıi – 27,8 paıyz. 44 elde kóleńkeli ekonomıkanyń deńgeıi 20 paıyzdan tómen, biz de osyndaı kórsetkishke umtylýymyz kerek. Baqylaýdan tys qyzmetti zańdastyrýǵa yntalandyrý arqyly zańnamalyq bazany jetildirý, kedendik jáne salyqtyq ákimshilendirýdi jaqsartý jumystary únemi júgiziledi. Qabyldanyp jatqan sharalardyń barlyǵy bıznes úshin tolyq zańdastyrýdyń tıimdi bolýyna, qolma-qol aqshasyz aınalym úlesin arttyrýǵa baǵyttalǵan», - dedi Premer.
Sonymen birge, Úkimet basshysy kóleńkeli úlesti odan ári tómendetý úshin salalyq sıpattaǵy qosymsha sharalar qajet ekenin aıtyp, birqatar vedomstvoǵa tapsyrma berdi.
«Birinshi, Qarjy mınıstrligi men basqa da múddeli memlekettik organdarǵa taldaý júrgizip, zańsyz valıýtalyq eksport-ımporttyq operatsııalardy joıý jóninde usynystar engizýdi tapsyramyn. Bul jumysqa «Atameken» kásipkerler palatasy da atsalyssyn. Ekinshi, Qarjy mınıstrligi qyzmetterdi tsıfrlandyrýdy, aqparattyq júıelerdiń ıntegratsııasyn, Qazaqstan aýmaǵynda taýarlardyń baqylanýyn jetildirý jumystaryn jalǵastyrýy qajet», - dedi A. Mamın.
Sondaı-aq Premer-Mınıstr tólemder men tólem júıeleri týraly qoldanystaǵy zańnamaǵa elektrondy aqsha ıelerin mindetti túrde anyqtaýǵa baǵyttalǵan ózgerister men tolyqtyrýlar engizý múmkindigin qaraýdy tapsyrdy.
«Úshinshi, bıznestiń kóleńkeden shyǵýyn ekonomıkalyq yntalandyrý boıynsha jumysty jalǵastyrý qajet. Bul memlekettik qoldaý sharalaryn jetildirýge, artyq talaptardy qysqartýǵa, qarjylandyrýdyń qoljetimdigin arttyrýǵa, ákimshilik kedergilerdi azaıtýǵa jáne naqty salyq salýdy belgileýge qatysty. Bıznesti ashyq júrgizý ekonomıkalyq turǵydan tıimdi bolýy tıis», - dedi Asqar Mamın.
Aıta keteıik, 2019 jyly jalpy ishki ónimge shaqqandaǵy kóleńkeli ekonomıka 23,62%-ke tómendedi .
Buǵan deıin QR Qarjy mınıstriniń mindetin atqarýshy Berik Sholpanqulov kóleńkeli ekonomıkany azaıtý úshin engizilgen sharalardy baıandaǵan edi.