Kóleńkeli ekonomıkadan Ózbekstannyń memlekettik bıýdjetine $2,4 mlrd zalal keldi

<p>TAShKENT. KAZINFORM &ndash; Kóleńkeli ekonomıkadan Ózbekstannyń memlekettik bıýdjetine 30 trln sým ($2,4 mlrd), al jalpy ishki ónimge 135 trln sým ($10,8 mlrd) zalal keldi. Muny 2024 jylǵy makroekonomıkalyq turaqtylyq pen ekonomıkalyq damýdyń basym mindetteri talqylanǵan keńeste prezıdent Shavkat Mırzıeev málim etti, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń menshikti tilshisi.</p>

Ózbekstan basshysy atap ótkendeı, 11 myńǵa jýyq qurylys kompanııasy (jalpy kompanııalardyń 41%) esep qujattarynda tek 1 qyzmetker jumys isteıtinin kórsetken. Óz kezeginde bul kompanııalar byltyr 4 trln sýmǵa ($322 myń) baǵalanǵan qurylys jumystaryn júrgizgen.

«Bir nárseni naqty túsiný kerek - kóleńkeli ekonomıka adal jumys isteıtin kásipkerler úshin úlken kedergi. Búginde jeke kásip ıeleri ózderiniń zańdy quqyǵyn alǵa tartyp, «adal básekelestik qaıda?» degen saýal qoıyp jatyr», - dedi Shavkat Mırzıeev.

Ózbekstan prezıdenti osyndaı olqylyqtardyń saldarynan qyzmet kórsetý salasynda - 140 trln sým ($11,2 mlrd), qurylysta - 50 trln sým ($4 mlrd), ónerkásipte - 40 trln sým ($3,2 dollar) kóleńkede qalyp otyrǵanyn aıtty.

Atalǵan máselelerdi sheshý úshin Bas prokýratýra janyndaǵy Ekonomıkalyq qylmystarǵa qarsy kúres departamentine birqatar qosymsha quzyret beriledi. Departament bazasynda ǵylymı-taldaý jáne oqytý ortalyǵy ashylady. Ol kóleńkeli ekonomıkaǵa yqpal etetin faktorlardy anyqtap, sheteldik tájirıbe negizinde usynys ázirleýmen aınalysady.

Sonymen qatar, Bas prokýratýrada Kóleńkeli ekonomıkaǵa qarsy kúres jónindegi jeke basqarma qurylady, tıisinshe onyń óńirlik bólimsheleri jasaqtalady.

Qosa ketsek, buǵan deıin Ózbekstandaǵy kóleńkeli ekonomıkanyń kólemi jalpy ishki ónimniń 25-ten 45 paıyzyna deıingi aralyqta ekenin jazyp edik.