«Kóleńkeden» mıllıarderler shyǵa bastady» - baspasózge sholý
***
«Egemen Qazaqstan» basylymynyń jazýynsha, 9-10 sáýirde «Jas Otan» jastar qanatynyń kezekten tys III sezi ótedi. Bul týraly keshe «Jas Otan» jastar qanatynyń 2020 jylǵa deıingi «Jastar - Otanǵa!» baǵdarlamasyn ázirleý boıynsha uıymdastyrylǵan qorytyndy jınalys barysynda belgili boldy. Bul baǵdarlama «Jas Otan» jastar qanatynyń kezekten tys III sezinde qabyldanatyn bolady. Ol uıymnyń ári qaraıǵy is-qımyly úshin ıdeologııalyq baǵdar bolmaq, sondaı-aq, «Qazaqstan-2050» Strategııasyn iske asyrýda tabysqa qol jetkizýge baǵyttalǵan. Otyrys barysynda «Jas Otan» jastar qanatynyń atqarýshy hatshysy Nurlan Sydyqov sóz alyp, atalǵan baǵdarlamada 4 negizgi baǵytqa aıryqsha nazar aýdarylǵanyna, bul qujattyń negizinde «Nurly Jol» baǵdarlamasy men «Nur Otan» partııasynyń Saıası doktrınasynda kórsetilgen qundylyqtar jatqanyna toqtaldy. Osy jaıynda «Baǵdarlama jobasy ázirlendi» degen maqalada basyldy.
Bas basylymda «Otandyq jańa messendjer» degen maqala kópshilik nazaryna usynylyp otyr. Memlekettik tildi damytý qory Prezıdent janyndaǵy Ortalyq kommýnıkatsııalar qyzmetinde iPhone jáne iPad tutynýshylary úshin qoljetimdi «Aıtys» atty tuńǵysh qazaqstandyq messendjerdiń tusaýkeserin ótkizdi. Atalǵan jańa otandyq jobany tanystyrǵan Memlekettik tildi damytý qorynyń dırektory Azat Shaýeev iTys (Aıtys) mobıldik qosymshasy qoldanýshylarǵa memlekettik tilde tolyqqandy hat-habar almasýǵa múmkindik berip qana qoımaı, sondaı-aq, álemniń ár qıyryndaǵy barsha qazaqstandyqtardy biriktirýdi kózdeıtindigin jetkizdi. Bul iTys ónimi Elbasy Nursultan Nazarbaevtyń elimizdi qarqyndy damytýdyń basty baǵdary retinde aıqyndaǵan ınnovatsııalyq jobalarynyń qataryna jatady, dep atap ótken A.Shaýeev alǵash ret «Aıtys» qazaqstandyq messendjeriniń tusaýkeseri ótken jyldyń qarashasynda ótkizilgendigin eske saldy. Bıylǵy jylǵy tusaýkeserde atalǵan jobanyń jetildirilip, birshama utymdy tustary bar ekendigin atap ótti. iTys Qazaqstanda, ásirese, jastar arasynda erekshe tanymal baılanys túrine aınaldy. Elimizdegi iTys-ty qoldanýshylar kún saıyn úsh mıllıonnan astam habarlama jiberip, mýltımedııalyq faıldar almasyp otyrady, dedi ol.
***
«Aıqyn» gazetiniń jazýynsha, Qazaqstannyń bıýdjetine buryn josparlanbaǵan qarjy kózinen 1 mıllıardtan astam túsim tústi. Elimizde júrip jatqan «múlikti jarııa etý» naýqany osyndaı paıda ákelip otyr. Taǵy bir aıta keter jaıt, búkil elimiz boıynsha ondaǵan myń úı zańdastyrylyp, olardyń ıeleri resmı túrde «baspanaly» bolýda. Eger ol azamattardyń arasynda buǵan deıin jergilikti ákimdikterde úı kezeginde turǵandary bolsa, endi osy raqymshylyq sharasynan keıin olar sol tizimnen shyǵarylatyn bolady. Qarjy mınıstrliginiń naýryz aıynyń sońyndaǵy málimeti boıynsha, jalpy quny 110,3 mıllıard teńgege baǵalanatyn 17 myń 695 obekt endigi raqymshylyqqa ilikti. Áıtkenmen, «kóleńkeden» jaryqqa shyǵatyn múlik pen kapıtaldyń kólemi budan áldeqaıda kóp ekendigi anyq. Osy jaıynda «Kóleńkeden» mıllıarderler shyǵa bastady» degen maqaladan oqı alasyzdar.
Osy basylymda «Altyn-valıýta qory artyp keledi» atty maqala jarııalandy. Qazaqstan altyn valıýtalyq rezerv boıynsha álemde 24-orynǵa jaıǵasty. Bul týraly Halyqaralyq valıýta qory habarlady. Elimizdiń qazynasynda 196,1 tonna altyn bary belgili boldy. Al kósh basynda AQSh tur. Onyń qorynda 8135 tonna altyn bar eken. Kórshiles Reseı 1207 tonna qundy altynymen altynshy orynǵa turaqtady. Altyn valıýtalyq rezerviniń artýy, elimizdegi altyn óndirisiniń áleýetine tikeleı baılanysty. Altyn úlesiniń kóbeıýine Elbasynyń «altyn óndirisin jylyna 70-100 tonnaǵa deıin jetkizý kerek» degen talaby da sebep bolǵanǵa uqsaıdy. Sebebi, altyn qory 500 tonnadan asatyn «Baqyrshyq» (Shyǵys Qazaqstan oblysy) pen Vasılevskoe (Aqmola oblysy) ken oryndary osy talap údesinen shyǵý úshin baryn salyp jatyr.
***
«Ekspress-K» gazetinde «Vırýsov boıatsıa - v Internet ne vhodıt» atty maqala berilgen. Qańtardan bastap Qazaqstan avtorlyq quqyq týraly zańnamany kúsheıtkenimen, zııatkerlik menshik turǵysyndaǵy zań buzýshylyqtar deńgeıi tómendemeı tur. Mysala baǵdarlamalyq jasaqtama salasynda qaraqshylyq deńgeıi 70 paıyzdan asyp otyr. Osyndaı málimetterdi Almatyda ótken «dóńgelek ústelge» qatysýshylar keltirdi. Atap aıtqanda, qazaqstandyqtar kompterlik vırýstar men kıbershabýyldarǵa jıi ushyrap jatsa da, alaıda kontrafaktilik baǵdarlamalyq jasaqtamany paıdalanýdy jalǵastyrýda.