Qoldanystaǵy zańdar memlekettik organdarǵa tolyq derbestik berip otyrǵan joq – Prezıdent

ASTANA. QazAqparat – Qoldanystaǵy zańdar memlekettik organdarǵa tolyq derbestik berip otyrǵan joq. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Men jańa ákimshilik reforma júrgizýdi tapsyrdym. Basty maqsat – atqarýshy bılik organdary jumysynyń tıimdiligin arttyrý. Qoldanystaǵy zańdar memlekettik organdarǵa tolyq derbestik berip otyrǵan joq. Mysaly, óz salasynda normatıvtik quqyqtyq aktiler qabyldaý úshin olardyń quzyreti zań júzinde bekitilýi kerek. Tapsyrmalar ýaqtyly oryndalmaıdy. Sheshim der kezinde qabyldanbaıdy. Sol sebepti, ózektiligin tez joǵaltady», - dedi Prezıdent.

Memleket basshysy bul problemany sheshý maqsatynda qazirdiń ózinde zańnamaǵa túzetýler engizilip jatqanyn aıtty. Ol túzetýler memlekettik organdarǵa ózderiniń salalyq quziretteri sheginde qajetti is-áreket qabyldaýǵa múmkindik beredi.

«Bul óz kezeginde atqarýshy bılik basshylary tarapynan kásibılikti, bastamashyldyq pen kóshbasshylyqty talap etedi», - dedi Qasym-Jomart Toqaev.