Qoldanystaǵy kóp deńgeıli zeınetaqy júıesin qaldyrý oryndy – Álıhan Smaıylov

NUR-SULTAN. QazAqparat – Senat depýtatynyń saýalyna joldaǵan jaýabynda QR Premer-Mınıstri Álıhan Smaıylov qoldanystaǵy kóp deńgeıli zeınetaqy júıesin qaldyrý oryndy degen ustanym bildirdi, dep habarlaıdy QazAqparat tilshisi.

«2023 jyldan bastap jumys berýshiniń mindetti zeınetaqy jarnalaryn engizý bolashaqta zeınetaqy tólemderiniń mólsherin ulǵaıtýǵa aıtarlyqtaı yqpal etedi. Álemdik tájirıbe jáne bizdiń otandyq praktıka (1999 jyly zeınetaqylar men járdemaqylar boıynsha boryshtar shamamen 39 mlrd teńgeni boldy) ártaraptandyrylǵan qarjylandyrý kózderi bar qazirgi kóp komponentti júıeniń turaqtylyǵyn kórsetti. Bolashaqta jınaqtaýshy komponent zeınetaqy tólemderin qamtamasyz etetin júıeniń negizgi deńgeıine aınalady», - dep jazylǵan jaýapta.

Premer-Mınıstrdiń deregi boıynsha, keıingi 10 jylda BJZQ zeınetaqy tólemderiniń ortasha mólsheri 10 ese, ıaǵnı 3 myńnan 30 myń teńgege deıin ósken.

«Búginde BJZQ-daǵy zeınetaqy jınaqtarynyń kólemi – 12,9 trln teńge. Al, belsendi salymshylardyń jeke zeınetaqy shottarynyń sany 9 mıllıonǵa jetip qaldy. Sonymen qatar, memleket jyl saıynǵy ınflıatsııany eskere otyryp, zeınetaqy jarnalarynyń saqtalýyna kepildik beretinin atap ótken jón. Ulttyq Bank 2014 jyldan beri zeınetaqy aktıvterine senimgerlik basqarýdy júzege asyryp keledi. Osy aralyqta jınaqtalǵan ınflıatsııanyń shamasy 90,68% bolsa, zeınetaqy aktıvteriniń jınaqtalǵan tabysy 104,45%-ǵa jetti. Nátıjesinde memlekettik kepildik tólemderi 12,8 mlrd teńgeden 1,4 mlrd teńgege deıin tómendedi. Osy aıtylǵandardy eskere otyryp, qoldanystaǵy kóp deńgeıli zeınetaqy júıesin qaldyrý oryndy dep sanaımyz», - delingen Úkimet bashysynyń jaýabynda.

Aıta ketsek, buǵan deıin Úkimet basshysy Álıhan Smaıylovtyń áıelderdiń zeınet jasy týraly depýtattyq saýalǵa bergen jaýaby jarııalanǵan bolatyn.