Qoldan jasalǵan brend ónimderine shekteýdi kúsheıtý: Senat zańdy maquldady

ASTANA. QazAqparat – Búgin Senattyń jalpy otyrysynda «TMD-ǵa qatysýshy memleketterdiń jalǵan taýar belgilerin jáne geografııalyq kórsetkishterdi paıdalanýdyń aldyn alý men jolyn kesý jónindegi yntymaqtastyǵy týraly kelisim» zańy maquldandy, dep habarlaıdy QazAqparat tilshisi.

Senatta qaralǵan tıisti zań jobasyn depýtat Qaırat Tastekeev tanystyryp, onyń mańyzdylyǵyna toqtaldy.

«Kelisimde jalǵan taýar belgileri men geografııalyq kórsetkishteri bar taýarlardy óndirý men ótkizýdiń anyqtalǵan faktileri týraly aqparat almasý, ónerkásiptik menshik salasynda birlesken ǵylymı zertteýler júrgizý, zııatkerlik menshik quqyqtaryn qorǵaý jáne saqtaý salasynda kadrlardy daıarlaý jáne olardyń biliktiligin arttyrý jónindegi birlesken is-sharalar kózdelgen», - dedi Qaırat Tastekeev.

Sondaı-aq ol kelisim TMD-ǵa qatysýshy memleketterdiń taýarlardy daralandyrý quraldaryn qorǵaýdyń ulttyq júıesin odan ári damytý jónindegi kúsh-jigerin biriktirýge baǵyttalǵanyn atap ótti.

«Zańdy qabyldaý teris áleýmettik-ekonomıkalyq jáne quqyqtyq saldarlarǵa ákep soqpaıdy, sondaı-aq respýblıkalyq bıýdjet esebinen qosymsha qarajatty talap etpeıdi. Búgingi tańda Armenııa, Belarýs, Ózbekstan jáne Qyrǵyzstan memleketishilik rásimderdi júrgizdi», - dep túsindirdi senator.

Belgili bolǵandaı, atalǵan kelisim jalǵan belgileri bar taýarlardy óndirý jáne ótkizý faktileriniń aldyn alý, anyqtaý jáne olardyń jolyn kesý baǵytyndaǵy sharalardy júrgizýge múmkindik beredi.

Talqylaý nátıjesi boıynsha Senat atalǵan zańdy maquldady.