Qol alyp amandasýdan bas tartyp, sálem berýge kóshý kerek – Tóregeldi Sharmanov

ALMATY. QazAqparat – Qazaqstandyqtarǵa qol alyp amandasýdan bas tartyp, qazaqtyń kóneden qalǵan dástúri «ıilip sálem berýdi» qaıta jandandyrý usynyldy, dep habarlaıdy QazAqparat tilshisi.

Mundaı usynysty S.Asfendııarov atyndaǵy Qazaq Ulttyq ýnıversıtetiniń qurmetti professory, Qazaq taǵamtaný akademııasynyń prezıdenti Tóregeldi Sharmanov jasady. Áleýmettik jelide professordyń osyǵan qatysty vıdeosy belsendi tarap jatyr.

«Qazaqtardyń buryn amandasý dástúri bolǵan – qolyn kókirekke qoıyp, ıilip sálem salý. Al qair barlyǵy qol alysyp amandasady. Bul óte qaýipti. Ol adam qaıdan shyqty? Al eger onyń qolyn almasań mensinbeı ketkendeı bolasyń. Al bul birinshi kezde gıgıenalyq tazalyq, densaýlyq kepili», - dedi Tóregeldi Sharmanov.

Aıta ketý kerek, qazir kóptegen elde koronavırýstyń taralýynan soń qol alyp amandasýdy shektep jatyr.

Qytaıda polıtsııa qyzmetkerleri arnaıy kezekshilikke shyǵyp, adamdarǵa dybys zoraıtqysh arqyly qol alyspaýǵa keńes berip turady.

Al Frantsııada bet súıisip amandasýdy azaıtyp jatyr. Qazir bul elde bir-biriniń júzine jyly qaraýdy jetkilikti sanap jatyr.

Juqpaly aýrýdyń taralýyn jedeldetetin dástúrlerden, sondaı-aq Polsha, Jańa Zelandııa, Rýmynııa, Ispanııa, Brazılııa elderinde de bas tartýda.

Aıta ketý kerek, álemde koronavırýs juqtyrǵandar sany 90 myńnan asty, 3110 adam kóz jumdy. Bul týraly Dúnıejúzilik densaýlyq saqtaý uıymynyń basshysy Tedros Gebrees málim etti.

Sońǵy 48 saǵatta Qytaıdan tysqary jerde tirkelgen 1848 jaǵdaıdyń 80% úsh elge tıesili: Iran, Italııa jáne Ońtústik Koreıa.