Kókjótel nesimen qaýipti

<p>PETROPAVL. KAZINFORM &ndash; Soltústik Qazaqstan oblysynda jyl basynan beri kókjóteldiń 62 jaǵdaıy tirkeldi. Aýyrǵandardyń 94% - 14 jasqa deıingi balalar. Ótken jyldyń uqsas merzimimen salystyrǵanda birden 60 jaǵdaıǵa ósken. Oblystyq sanıtarııalyq-epıdemıologııalyq baqylaý departamentiniń ınfektsııalyq jáne parazıttik aýrýlardy epıdemıologııalyq qadaǵalaý bóliminiń bas mamany Gúlıda Jakeeva bakterııalyq ınfektsııany juqtyrýdyń adam ómirine qandaı qaýpi barlyǵy jaıynda aıtyp berdi.&nbsp;</p>

Bıyl SQO-da kókjóteldi juqtyrý eselep artqan. Mamannyń aıtýynsha, oblysta 2021 jyly aýrý tirkelmese, 2022 jyly bir bala aýyrǵan, byltyr 20 adamǵa dıagnoz qoıylǵan.

«Bıyl qańtarda 8 adam, aqpan-naýryzda 4-5 adamnan aýyrsa, sáýirde juqtyrǵandar sany kúrt artyp, 16 adam em alǵan. Mamyrda kókjótelmen aýyrýdyń – 13, maýsymda – 6, shildede 10 jaǵdaıy tirkeldi.

Aýyrǵan 62 adamnyń 58-i – 14 jasqa deıingi bala. Syrqattanǵandardyń ishinde Petropavldyń úlesi basym, oblys ortalyǵynda 49 adam aýyrdy, Qyzyljar aýdanynda – 6, Aıyrtaýda – 2 jáne qalǵan aýdandarda bir-birden tirkeldi.

90% nemese 56 jaǵdaıda syrqattanǵandar vaktsına almaǵan.

Bakterııalyq ınfektsııanyń taralýynyń basty sebebi de osy, sońǵy jyldary vaktsına qoıdyrýdan bas tartqandar kóbeıdi. Bul vaktsınatsııa arqyly baqylanatyn dert. Kóp jaǵdaıda, kókjótel - bul balanyń ınfektsııasy. Ol negizinen tórt jastan asqan balalarǵa tez juǵady. Aýrýǵa qarsy ımmýnıtet ana sútimen berilmeıdi, sondyqtan balalyq shaqta aýrýdy juqtyrý yqtımaldyǵy joǵary. Balabaqshaǵa nemese bilim berý ortalyqtaryna baratyn balalar jıi aýyrady, oıyn alańynda, serýendeý kezinde nemese úıge kelgen qonaqtarmen qarym-qatynas kezinde de juqtyrý múmkindigi joǵary», - deıdi Gúlıda Jakeeva.

Kókjótel – aýyz qýysynda, murynda jáne kómeıde bolatyn Bordetella pertussis bakterııasy týdyratyn tynys alý joldarynyń óte juqpaly aýrýy. Eresek adamda nemese balada spastıkalyq jótel ustamalary paıda bolady, bul aýyr anatomııalyq, fızıkalyq zaqymdanýlarǵa, ókpeniń obstrýktıvti aýrýlary men pnevmonııanyń odan ári damýyna ákelýi múmkin.

Mamannyń aıtýynsha, kóp jaǵdaıda kókjótel qarapaıym respıratorlyq vırýstyq ınfektsııa sııaqty bastalady, ortasha qurǵaq jótel jáne murynnan sý aǵý paıda bolady, dene temperatýrasy 37-38 gradýsqa deıin kóterilýi múmkin.

«Kókjóteldiń birinshi kezeńi kataraldi dep atalsa, keıin spazmalyq jótel kezeńine ótedi. ıAǵnı jótel ustamasy jıileıdi, ol toqtaýsyz spastıkalyq sıpatqa ıe bolady. Ustama 2-3 mınýtqa deıin sozylýy múmkin. Kókjótel ustamasy kezinde adamnyń beti qyzarady nemese tipti kógerip, moıyn tamyrlary isinýi múmkin. Al úshinshi kezeńi - rekonvalestsentsııa - qalpyna kelý kezeńi, syrqattyń beti beri qarap, jóteliniń azaıýy.

Kókjótel kóbinese qaıtalama ınfektsııalardyń qosylýymen túrli asqynýlardy týdyrady, ásirese tynys alý júıesiniń aýrýlary jıi kezdesedi: bronhıt, plevrıt, emfızemanyń damýy da múmkin. Sırek jaǵdaılarda ókpe aýrýlaryna - atelektazǵa, pnevmotoraksqa ákeledi. Kókjótel ókpeniń qabynýy, mıdyń zaqymdanýy sııaqty asqynýlarmen qaýipti», - deıdi Gúlıda Jakeeva.

Kókjótelmen aýyratyn naýqastardy emdeýge arnalǵan dári-dármekter joq.

«Balalardy jáne barlyq eresekterdi kókjótelden qorǵaýdyń jalǵyz senimdi jáne tıimdi ádisi - erte balalyq shaqtan bastalatyn vaktsınatsııa. Alǵashqy vaktsınatsııa 2, 3, 4 jáne 18 aılarynda bastalady, sodan keıin 6 jasta júrgiziledi. Eger osy jaǵdaılar saqtalsa, aǵzada kókjótel aýrýyna jetkilikti kúshti ımmýnıtet paıda bolady», - deıdi dáriger.

Buǵan deıin SQO-da kókjótelden em alǵan balalardyń sany bes ese artqanyn jazǵan edik.