Kókjótel asqynsa basqa da aýrýlarǵa ákelýi múmkin

<p>ALMATY. KAZINFORM &mdash; Kókjótel &mdash; búkil álemge taraǵan endemııalyq, zardabyn vaktsına arqyly aldyn alýǵa bolatyn balalar aýrýy. Ol sondaı-aq jótelmen birge joǵarǵy tynys joldarynyń bakterııalyq ınfektsııasy bolyp tabylady. Bul týraly Almaty No36 qalalyq emhananyń pedıatrııa bóliminiń meńgerýshisi Dınara Qaıypova aıtty. &nbsp;</p>

Dárigerlerdiń aıtýynsha, kókjótel balalar men jasóspirimderge úlken qaýip tóndiredi. Alaıda, eresekterde aýrýdyń asqynýy tómen, sebebi, ol balalyq shaqta alǵan ekpeden keıingi ımmýnıtettiń damýymen baılanysty. Eger ekpe jasalmasa, ınfektsııanyń aýyr túrde ótedi.

«Kókjótelge tán belgiler ınfektsııa juqtyrǵannan keıingi 10-14 kúnnen keıin damı bastaıdy. Aýrý birneshe damý satysynan ótedi. Kataraldy kezeńde sýyq tııýge uqsas belgiler baıqalady, ıaǵnı, dene ystyǵynyń kóterilýi, murynnan sý aǵý, túshkirý men qurǵaq jótel. Kelesi satysynda aýrý spazmatıkalyq jótelmen qarqyndy túrde damı bastaıdy. Jótel naýqasty ásirese túngi jáne tańǵy ýaqyttarda mazalaıdy. Shýly ysqyryqty syryl estiledi. Jótel ustamalary aýany jutýsyz bastalyp, dem alǵanda kómeı ysqyryǵymen aıaqtalady. Otteginiń jetispeýinen bet qyzaryp isinedi. Nárestelerde spazmatıkalyq jótel tynys alýdyń toqtap qalýymen birge júredi, jalpy qurysý oryn alýy múmkin. Aýyra bastaǵanda qaqyryqtyń joǵary tutqyrlyǵyna baılanysty bronh jetkiliksizdigi baıqalady. Balalarda kókjóteldiń belgileri orta eseppen 4-6 apta boıy belsendi bolady. Emdeý kezeńi 3-4 aıǵa deıin sozylady, bul kezde qaldyq jótel birte-birte basylady», — deıdi Dınara Qaıypova.

Dáriger kókjóteldi aldyn alýdyń eń tıimdi joly — ımmýndyq júıeni nyǵaıtý, vaktsına alý jáne der kezinde dıagnoz qoıý ekenin atap ótti. Statıstıka boıynsha jasóspirimderdiń 40%-y dıagnozy qoıylmaǵan kókjótelge baılanysty jóteledi eken. Eresekterde bul sozylmaly jóteldiń qozdyrǵysh faktory bolyp tabylady. Infektsııanyń turaqty túrde taralýy qorshaǵan ortada balalar men eresekterdiń aýrýdy ary qaraı juqtyrýǵa ákeledi.

«Eger sizdiń balańyzda kókjótel belgileri baıqalsa, aýrýhanaǵa jatqyzý qajet bolýy múmkin. Dárigerdiń sheshimi naýqastyń jasyna jáne jaǵdaıyna baılanysty bolady. Negizgi asqyný — bakterııalyq ınfektsııanyń qaıtalanyp damýy. Kókjótel asqynǵan jaǵdaıda kelesi dıagnozǵa aınalýy múmkin: bakterııalyq pnevmonııa, ókpeniń kollapsy, plevrıt, bronhıt, jarylǵan qulaq qalqany, otıt jáne sınýsıt, gryjanyń qalyptasýy, qabyrǵanyń synýy (eresekterde). Osyǵan baılanysty vaktsına alý — aýyr zardaptarǵa, tipti ólimge ákelýi múmkin qaýipti juqpaly aýrýlardan qorǵanýdyń tıimdi quraly bolyp tabylady. Kókjótel — qaýipti aýrý ekenin este ustaǵan jón. Ýaqtyly vaktsına alý jáne dárigerden keńes alý — aýrý men asqynýdyń taralýyn boldyrmaýǵa kómektesedi», — dep qorytyndylady Dınara Qaıypova.