«Kókjıde» qumyn saqtaý: Aqtóbe oblysynda munaı kompanııalarynyń jumysy toqtatylady
Aqtóbe oblysynyń prokýrorlary «Kókjıde» qumy me jerasty sýyn saqtaýǵa arnalǵan jumysty jiti baqylap otyr. Sebebi bul jerdegi qor elimizdiń Aqtóbe, Atyraý, Mańǵystaý oblystaryn sapaly aýyz sýmen qamtýǵa múmkindik beredi. Ári memlekettik tabıǵı qoryq qorynyń tizimine alynǵan.
«Bas prokýratýranyń tapsyrmasy boıynsha oblys prokýratýrasy ýákiletti memlekettik organdarmen birge jer qoınaýyn paıdalanýshylardy tekserip otyrady. Munda zańsyzdyqtar tirkeldi. «Kókjıde» qumy lastanǵan, avarııalyq jaǵdaı ekologtarǵa habarlanbady. Óndiristik qaýipsizdik te eskerilmedi. Tipti asmosferaǵa shamadan tys las zattar shyǵaryldy. Barlyǵy 200 mln teńge bolatyn 170-ten astam ákimshilik aıyppul salyndy. Sonymen birge keltirilgen zalal 7 mlrd teńge bolady. Qazir óndirý jumystary júrip jatyr», - dedi Aqtóbe oblysy prokýrorynyń aǵa kómekshisi Asylbek Sábıtov.
Sonymen birge Qylmystyq kodekstiń «Jer qoınaýyn óz betinshe paıdalaný», «Jerdi búldirý» baptary boıynsha sotqa deıingi tergeý júrip, zalal tolyq ótelgen soń, óndirister toqtatyldy.
«Oblys prokýratýrasy qabyldaǵan sharalar negizge alynyp, Energetıka mınıstrligi «Kókjıde» ken ornyndaǵy «SNPS-Aqtóbemunaıgaz» AQ (10 uńǵyma), «KMK Munaı» AQ (68 uńǵyma), «Fırma Ada Oıl» JShS-niń (56 uńǵyma) jumysyn toqtatý sharasyn bastady. Bári oblys prokýratýrasynyń nazarynda», - dedi Asylbek Sábıtov.