«Kókjaılaý» jobasyn qarjylandyrýda zań buzýshylyqtar anyqtaldy

NUR-SULTAN. QazAqparat - «Kókjaılaý» taý shańǵysy kýrorty jobasyn qarjylandyrý barysynda zań buzýshylyqtar anyqtaldy. Bul týraly QR Qarjy mınıstrligi Іshki memlekettik aýdıt komıteti tóraǵasynyń orynbasary Erjan Myńjasarov aıtty, dep habarlaıdy QazAqparat tilshisi.

«Qysta «Kókjaılaý« kýrorty qurylysyna jumsalǵan barlyq qarajatty tekserý týraly tapsyrma tústi. Ókinishke oraı, qysqy ýaqytta taýly aımaqqa baryp, baqylaý sharalaryn júrgizýge múmkindik bolmady. Meniń bilýimshe, bul tekserý qolaıly jaǵdaı týyndaǵannan keıin júrgizildi. Tıisti aýdıtorlyq sharalar zańnamany buzýdyń jekelegen faktilerin anyqtady. Materıaldar quqyq qorǵaý organdaryna, naqty aıtqanda Sybaılas jemqorlyqqa qarsy is-qımyl agenttiginiń Almaty qalalyq departamentine protsessýaldyq sheshim qabyldaý úshin berildi», - dedi Erjan Myńjasarov Ortalyq kommýnıkatsııalar qyzmetindegi baspasóz máslıhaty barysynda BAQ ókilderiniń saýalyna oraı.

Esterińizge sala ketsek, 2019 jyldyń 3 sáýirinde Іle Alataýy ulttyq parki aýmaǵyndaǵy 5 jer ýchaskesi jalǵa berý úshin tenderge qoıylǵany belgili boldy. Bul jobaǵa qoǵam tarapynan narazylyq týyndap, keıinnen Memleket basshysy Qasym-Jomart Toqaev Kókjaılaý taý shańǵysy kýrorty jobasymen aınalysýǵa tyıym salǵan edi.