Kókjaılaý Іle Alataýy ulttyq parkiniń quramyna kirgizilmek

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Serikqalı Brekeshev Kókjaılaý shatqalynyń Іle Alataýy ulttyq parkiniń quramyna qashan qaıtarylatynyn aıtyp berdi, dep habarlaıdy QazAqparat tilshisi.

Mınıstr 2020 jylǵy 30 qyrkúıekte qordaǵy jerlerdi erekshe qorǵalatyn tabıǵı aýmaqtardyń jerlerine aýystyrý tártibin retteıtin zań qabyldanǵanyn eske saldy.

«Atalǵan zańnyń qabyldanýy Kókjaılaý jobasynyń jerlerin Іle-Alataý ulttyq parkiniń quramyna qaıtarýǵa negiz boldy. Búginde jer kólemi shamamen 1000 gektardy quraıdy, qazirgi ýaqytta Іle-Alataý ulttyq parkine jer berý týraly Úkimet qaýlysynyń jobasy ázirlenýde», - dedi mınıstr Ortalyq kommýnıkatsııalar qyzmetinde ótken brıfıngte.

Mınıstrdiń aıtýynsha, qaýly jobasyn kelisý jáne ony bekitý rásimi shamamen bir aıǵa sozylady, al Kókjaılaýdy Іle-Alataý ulttyq parkiniń quramyna qaıtarý protsesi jyl sońyna deıin aıaqtalmaq.