Qoqysqa toly Aqtóbe máseleni tarıfti kóterý arqyly sheshpek

AQTÓBE. QazAqparat – Aqtóbede qoqys shyǵarý kompanııalary jumysyn toqtatyp, qalany tazalaý qıyndaı tústi, dep habarlaıdy QazAqparat tilshisi.

Buǵan deıin habarlaǵanymyzdaı, Aqtóbe qalasy qoqysqa tolyp, eki kompanııa jumysyn toqtatqan bolatyn. Qala ákimi Mavr Abdýllın másele tek tarıfti kóterý arqyly ǵana sheshiletinin aıtty.

«Birinshiden, tarıf máselesi. Turǵyndar jan basyna 104 teńge tólep otyr. Bul az. Sondyqtan eki qoqys shyǵaratyn kompanııa jumysyn toqtatyp, barlyq jumysty tek bir kompanııa atqaryp júr. Jumys kúni-túni baqylaýǵa alyndy. Bir kompanııa Reseıden tehnıka satyp ákelip, aldaǵy aıda máseleni sheshpekpiz», - dedi qala ákimi Mavr Abdýllın.

Onyń aıtýynsha, tarıf keler jyldyń basynda kóteriledi. Ol kezde qalany eki kompanııa tazalamaq. Qalalyq máslıhat depýtattary tarıfti kóterýge kelisken.

«Qalanyń qoqysy kúndelikti kózge túsedi. Óz qalamyzdyń mundaı jaǵdaıda bolǵany uıat», - dedi oblys ákimi Ońdasyn Orazalın.