Qoqys tasymaldaıtyn barlyq kólikter baqylaýǵa alynady

ASTANA. QazAqparat - Qazaqstanda qoqys tasymaldaıtyn barlyq kólikter baqylaýǵa alynyp, olarǵa GPS-júıe engiziledi. Bul týraly Parlament Senatynda turmystyq qaldyqtar máselelerine arnalǵan «Óńir» depýtattyq tobynyń otyrysynda QR Energetıka vıtse-mınıstri Sábıt Nurlybaı aıtty, dep habarlaıdy QazAqparat.

«Aldaǵy jyldan bastap qoqys óńdeıtin kompanııalardaǵy árbir avtokólik úshin GPS-júıeni engizýdi josparlap otyrmyz. Ózderińiz bilesizder, kóktemde qala mańynda ruqsat etilmegen qoqys oryndary paıda bolady. Mundaı jaǵdaıǵa jol bermes úshin GPS-júıe tıimdi shara bolar edi», - dedi vıtse-mınıstr.

Onyń sózine qaraǵanda, mınıstrlik kelesi jyldan bastap ákimdikterdiń óńirlerdegi turmystyq qatty qaldyqtardy kádege jaratýdyń jáne qaıta óńdeýdiń qazirgi zamanaýı ádisteri men tehnologııalaryn endirý boıynsha jumysyna baǵalaý júrgizedi. Bul sharalar nátıjeleri mınıstrlik pen ákimdikterdiń resmı saıttarynda jarııalanady.

«Elimizde «Jasyl ekonomıkaǵa» kóshý jóninde tujyrymdamada 2030 jylǵa qaraı qaldyqtardy qaıta óńdeý úlesin 40 paıyzǵa, al 2050 jylǵa deıin 50 paıyzǵa jetkizý kózdelgen. Bıylǵy 10 aıda Qazaqstanda 3,7 mln tonna turmystyq qatty qaldyqtar jınaldy. Onyń ishinde 400 myń tonnadan astamy nemese 10,8 paıyz qaıta óńdeldi jáne kádege jaratyldy», - dedi S. Nurlybaı.

Osy oraıda, ol atalǵan kórsetkish 2017 jyly 9 paıyz deńgeıinde bolsa, 2016 jyly 2,6 paıyzdy qamtyǵanyn eske salyp ótti.