Kóktóbedegi «densaýlyq joly» qashan ashylady
Almaty turǵyndarynyń «Kóktóbege qatysty» ótinishin eskere otyryp, qala ákiminiń tapsyrmasy boıynsha 2023 jyldyń qazan aıynda jaıaý júrginshilerge arnalǵan densaýlyq jolynyń qurylysy bastalǵan edi.
Buryn bul jol jaıaý júrginshilerdi jol boıymen júrý qajettiligin eskermeı jobalanǵan bolatyn, sonyń saldarynan almatylyqtar qaýipti jol boıymen júrýge májbúr boldy. Densaýlyq joly paıdalanýǵa berilgen kezde bul másele túbegeıli sheshiledi. Saıabaqqa aparatyn joldyń uzyndyǵy – 1,2 shaqyrym.
«Merkýr holdıng» JShS bas dırektory Esenǵalı Baımenovtiń sózinshe, qazir soqpaqtyń qurylysy aıaqtalyp, asfalt tóselip, shekara belgileri ornatyldy. Aldaǵy ýaqytta eki qaraý alańyn, baspaldaq jolyn salý jáne oryndyqtar men qorshaýlardy ornatý josparda. Buryn munda abattandyrylmaǵan ýchaske bolǵan.
Qala basshysy birqatar eleýli kemshilikti joıý kerektigin eskertti. Ol Kóktóbe saıabaǵyna kire beristegi shlagbaýmdar mańyndaǵy keńistikti jabdyqtap, jaıaý júrginshiler jolyna jaryq pen qala turǵyndary ustap ótetin tutqalar ornatý qajet ekenin atap ótti.
Erbolat Dosaev munda kelýshiler men týrıster úshin iske asyrylyp jatqan jobanyń mańyzdylyǵyna toqtaldy. Ásirese, qala turǵyndarynyń qaýipsizdigi basty nazarda ekenin jetkizdi.
Eske salaıyq, bul joba jeke ınvestıtsııalar esebinen júzege asyrylyp jatyr. Jalpy, aldaǵy jyldary Almatyda kóbirek qoǵamdyq keńistikter paıda bolady. Esentaı, Úlken Almaty ózenderiniń boıyndaǵy jaǵalaýlarǵa rekonstrýktsııa júrgiziledi. Osy jyly jaıaý júrginshilerge baǵdarlanǵan uzyndyǵy 17 shaqyrym Raıymbek dańǵylyn qaıta jańǵyrtý kózdelgen. Pýshkın kóshesi boıynsha Gogol kóshesinen Raıymbek batyr dańǵylyna deıingi uzyndyǵy 1,1 shaqyrym jaıaý júrginshiler aımaǵy abattandyrylady.
Buǵan deıin Erbolat Dosaev «Kóktóbe» telemunarasy jazǵa qaraı jaryqtandyrylatynyn aıtqan bolatyn. Qurylys-montaj jumystary bıyl mamyr-maýsym aılarynda aıaqtalady.