Kóktemgi sý tasqynynda zardap shekken aýyl turǵyndary jańa baspana aldy - Qaraǵandy oblysy
«Qaraǵandy oblysyndaǵy Buqar jyraý aýdanynyń Aqtóbe, Yntymaq, Sarytóbe aýyldarynda kóktemgi sý tasqynynan zardap shekkenderge arnalǵan úılerdiń qurylysy aıaqtaldy», - delingen habarlamada.
Aqtóbe aýyldyq okrýginiń Aqtóbe jáne Yntymaq aýyldarynda 36 bir jáne eki páterlik turǵyn úılerdi sý basyp, 51 otbasy zardap shekken. Táýelsiz saraptama Aqtóbedegi eki úıdi, al Yntymaqta bir úıdi apatty jáne turýǵa laıyqty emes dep tanydy. Zardap shekken turǵyndarǵa joǵaltqan múlki úshin 6,5 mln. teńge kóleminde ótemaqy tólengen. Sondaı-aq, gýmanıtarlyq kómek kórsetildi. «Jańa baspanaǵa kóshýdi otbasymyzben kópten kúttik. Jańa úıimiz burynǵydan da jaqsy. Qurylysshylar kúndiz-túni jumys istep, eki aıdyń ishinde irgetasy bıik, bólmeleri keń ádemi úı salyp berdi. Meniń basty tilegim - elimizdiń beıbitshiligi men amandyǵy, osyndaı tabıǵı apattar endi eshqashan bolmasyn», - dedi bılik pen qurylysshylarǵa alǵysyn bildirgen Yntymaq aýylynyń turǵyny Tıyshtyq Sarına. Kókpekti aýyldyq okrýginiń Sarytóbe aýylynda sý tasqyny saldarynan jol shaıylyp ketti. Adamdar qaýipsiz jerge temirjol arqyly kóshirilgen. 48 úıdi (61 páter) sý basyp, sonyń 17-si apatty bolyp tanyldy. «Qazirgi ýaqytta 12 úı salynǵan. Jyljymaıtyn múlikke quqyq belgileýshi qujattary bolmaǵan qalǵan zardap shegýshiler úshin basqa úıler satyp alynyp, oblystyq qoǵamdyq qaıyrymdylyq qorynyń qarajatynan materıaldyq kómek tólenip jatyr. Budan basqa, zardap shekken barlyq adamdarǵa tabıǵı apat saldarynan keltirilgen shyǵyndy óteý boıynsha 23,6 mln. teńge somasyna ótemaqy tólengen», - dep atap ótiledi habarlamada. Sarytóbeniń jańadan qonystanýshylary kórsetilgen kómek pen jańa úıler úshin alǵysyn bildirdi.