Kóktemgi egis jumystaryn qarjylandyrý jáne agroónerkásiptik keshendi damytý baǵyttaryn sýbsıdııalaý taqyrybyna arnalǵan úkimettik saǵat otyrysy boldy
dep habarlady Senattyń baspasóz qyzmeti.
Agrarlyq máseleler jáne qorshaǵan ortany qorǵaý komıteti uıymdastyrǵan bul sharaǵa Senat depýtattary, Prezıdent Ákimshiligi, Úkimet ókilderi, Aýyl sharýashylyǵy mınıstrligi, «QazAgro» ulttyq holdıngi» AQ basshylary qatysty.
Úkimettik saǵat otyrysyn ashqan Senat tóraǵasynyń orynbasary Muhambet Kópeev Memleket basshysynyń Qazaqstan halqyna Joldaýynda belgilengen mindetterge toqtala kelip, talqylaýǵa usynylǵan máselelerdiń kókeıkestiligin atap ótti.
M.Kópeevtiń aıtýynsha, agroónerkásip keshenin damytý úshin qajetti quqyqtyq baza qalyptasty, memlekettik qoldaý sharalary agroónárkásip keshenin nyǵaıta túsip, onyń ornyqty damýy úshin senimdi tuǵyr bolyp otyr.
«Sońǵy toǵyz jyl aralyǵynda respýblıkalyq bıýdjettiń agroónerkásiptik keshenin damytýǵa 790 mıllıard teńge, al jergilikti bıýdjetterden - 250 mıllıard teńgege jýyq qarjy bólindi. Bul orasan zor qarajat»,-dep atap ótti tóraǵa orynbasary.
M.Kópeev agroónerkásip keshenin damytý salasynda Memleket basshysy alǵa qoıǵan mindetterdi júzege asyrý úshin biz jańa aýyl sharýashylyǵynyń eksporttyq áleýetin arttyrýǵa, onyń básekege qabilettiligin ulǵaıtýǵa, otandyq naryqty óz ónimderimizben toltyrýǵa yqpal etetin jańa qadamdar men ınnovatsııalyq tehnologııalardy engizýimiz kerek dep atap ótti.
Osyǵan baılanysty tóraǵa orynbasary 2014 jyly agroónerkásip kesheniniń ónimdiligi eki ese ósýge, ishki naryqta azyq-túlik taýarlary 80 paıyzǵa qamtamasyz etilýge, eksporttyq áleýet 2015 jyly 4 paıyzdan 8 paıyzǵa deıin ulǵaıýy tıis ekenin eske saldy.
Otyrysta kóktemgi egis jumystaryn ýaqytynda qarjylandyrý jáne agroónerkásip kesheniniń basym salalaryn sýbsıdııalaý úshin qabyldanǵan sharalar týraly aýyl sharýashylyǵy mınıstri A.Kúrishbaev jáne «QazAgro» ulttyq holdıngi» AQ basqarma basshysy A.Mamytbekov depýtattarǵa baıandady.
Úkimettik saǵattaǵy sala basshylarynyń esebi barysynda aýyl sharýashylyǵy ónimderin óndirýshilerdi qoldaý sharalaryna, nesıe resýrstarymen ýaqytynda qamtamasyz etý, tómen baǵaly janar-jaǵar maıǵa qol jetkizýge qatysty depýtattar qoıǵan saýaldarǵa jaýap berildi.