Kóktemgi dala jumystaryna keshendi qoldaý kórsetý kerek – Tımýr Jaqsylyqov

ASTANA. QazAqparat – QR Ulttyq ekonomıka birinshi vıtse-mınıstri Tımýr Jaqsylyqov óńirlerdiń atqarýshy organdaryna birqatar usynym berdi, dep habarlaıdy QazAqparat tilshisi.

«Ortalyq jáne jergilikti atqarýshy organdarǵa kelesi sharalarǵa nazar aýdarý usynylady: Áleýmettik mańyzy bar azyq-túlik baǵasynyń ósýine jáne jemis-kókónis baǵasynyń alypsatarlyq maýsymdyq aýytqýyna jol bermeý sharalaryn júrgizý kerek; ekonomıka salalarynda ósýdiń oń qarqynyn qamtamasyz etý sharalaryn iske asyryp, kóktemgi dala jumystaryna daıyndyqqa keshendi qoldaý kórsetý qajet», - dedi T. Jaqsylyqov Úkimettiń búgingi otyrysynda.

Onyń aıtýynsha, jobalyq-smetalyq qujattama men tehnıkalyq-ekonomıkalyq negizdemeni sapaly daıyndaý, qurylys-montajdaý jumystaryn ýaqytyly júrgizý jáne bıýdjettik baǵdarlamalar ákimshileriniń qarajatty ónim berýshige deıin jetkizýi mańyzdy.

«Sonymen birge, shıkizattyq emes eksportty jan-jaqty qoldaý jáne balamaly eksporttyq baǵyttardy ulǵaıtyp, sý tasqynyna qarsy keshendi daıyndyq jumystaryn júrgizý kerek», - dedi Tımýr Jaqsylyqov.

Aıta keteıik, Qańtar aıynda Qazaqstan ekonomıkasy 5,6%-ke ósken. Onyń ishinde naqty sektordaǵy ósim 2,3%, al qyzmet kórsetý salasynda – 7,6% kórsetken.

Sondaı-aq, Qazaqstannyń 14 óńirinde óńdeý ónerkásibi artqan.