Kóktemgi dala jumystaryna 380 myń tonna dızel jeńildikpen beriledi

NUR-SULTAN. QazAqparat – QR Energetıka vıtse-mınıstri Áset Maǵaýov 2021 jylǵy kóktemgi dala jumystaryna dızel otynyn jetkizýge jumystaryn baıandady, dep habarlaıdy QazAqparat tilshisi.

«Munaı ónimderiniń jekelegen túrlerin óndirýdi jáne olardyń aınalymyn memlekettik retteý týraly» QR Zańyna sáıkes Energetıka jáne Aýyl sharýashylyǵy mınıstrlikteri «Kóktemgi egin jumystaryn júrgizýge dızel otynyn jetkizý boıynsha oblystardy munaı óńdeıtin zaýyttarǵa jáne resýrs ustaýshylarǵa bekitý kestesin» ázirledi. Keste aıasynda aýyl sharýashylyǵy taýaryn óndirýshilerge Pavlodar munaı-hımııa zaýyty men «PetroQazaqstan oıl prodakts» JShS-dan – tonnasyna 174 myń teńgeden, Atyraý munaı óńdeý zaýytynan – tonnasyna 172 myń teńgeden jeńildetilgen dızel bólinedi. Keste boıynsha 380 myń tonna dızel qarastyrylǵan», - dedi Áset Maǵaýov Ortalyq kommýnıkatsııalar qyzmetinde ótken baspasóz máslıhatynda.

Jetkizýdi jáne basqa da shyǵyndardy eskere otyryp, aýyl sharýashylyǵy taýaryn óndirýshilerge dızel baǵasy janarmaı quıý stansalaryndaǵy bólshek saýda baǵasynan 13-14%-ǵa (21-22 teńge/lıtr) tómen.

«Aýyl sharýashylyǵy taýaryn óndirýshilerge (AShTÓ) munaı óńdeý zaýyttarynan dızeldi tıep-jóneltýge basymdyq beriledi. Tıep-jóneltý táýlik saıyn baqylanady jáne qadaǵalanady. Aıta ketý kerek, mınıstrlikte AShTÓ úshin dızel otynyna arzandatylǵan baǵalardy zańnamalyq bekitý quzyreti joq. Biraq, aAýyl sharýashylyǵynyń muqtajdyqtary úshin dızel otynynyń quny janar-jaǵarmaı naryǵyna qatysýshylarmen kelisý jolymen aıqyndalady jáne resýrs ustaýshylardyń ózderi erikti túrde belgileıdi», - dep túsindirdi vıtse-mınıstr.

Bıylǵy 9 naýryzdaǵy jaǵdaı boıynsha 11,3 myń tonna dızel tıep-jóneltildi.