Kóktemgi sý tasqyny: Abaı oblysynda jaǵdaı turaqty ma

<p>SEMEI. KAZINFORM &ndash; Abaı oblysynyń qala, aýdandarynda úılerdi sý basýyna jol bermes úshin birqatar is-shara atqarylyp jatyr.&nbsp;</p>

Qazirgi tańda Jarma aýdanynda qar tazalaý jumystaryna 16 tehnıka jáne 40 adam jumyldyrylǵan.

«Merdiger mekemeler aýyldyq okrýg aýmaǵynan 24 900 sharshy metr qar shyǵardy. Aýdandyq mańyzy bar avtomobıl joldary men aýyldarda 40 aryq, 148 sý ótkizgish qubyr men 21 kópir bar. Aýdannyń 19 okrýgindegi sý ótkizgish qubyrlardy, erigen sý júrý arnalaryn jáne barlyq kópirdi qardan tazartý jumystary qarqyndy júrip jatyr», - dep habarlady oblys ákimdiginen.

Borodýlıha aýdanynda qar tazalaýǵa 70 tehnıka tartyldy. Arnaıy tehnıka qatarynda avtogreıderler, aspaly shnekorotor, traktorlar, tıegishter jáne K-700 bar.

«Búginde 35,5 myń tekshe metrden astam qar shyǵaryldy. Aýdandaǵy 16 kópir tolyqtaı qardan tazartyldy. Sý ótkizgish qubyrlardy tazartý jumystary jalǵasýda», - delingen aqparatta. 

Foto: Abaı oblysynyń ákimdigi

Oblys ákimi Nurlan Uranhaev Maqanshy aýdany Baqty aýylyna baryp, jaǵdaımen tanysty. Ol úılerin sý basý qaýpi tóngen jergilikti turǵyndarmen kezdesti. 

«Biz kóktemgi sý tasqynynyń aldyn alý jumystaryn júrgizip jatyrmyz. Basty maqsatymyz – halyqtyń qaýipsizdigin qamtamasyz etý. Turǵyndardy jáne olardyń múlkin qorǵaý úshin barlyq kúsh-jigerdi jumsaýǵa daıynbyz. Qajet bolǵan jaǵdaıda jergilikti atqarýshy organdar zardap shekkenderge kómek kórsetýge ázir, sondyqtan alańdaýǵa esh negiz joq», - dedi ákim. 

Eske salsaq, 9-10 naýryzda erigen qar sýynyń saldarynan Baqty aýylyn sý basý qaýpi týyndaǵan edi. Jergilikti atqarýshy organdar men TJD birlesken jumysynyń nátıjesinde qyzyl sýdyń úılerge kirýine jol berilmedi.