Kóktemgi sý tasqyny: 2,5 myńnan astam úıdiń qurylysy aıaqtaldy
«Sý tasqyny elimizdiń 10 óńirinde boldy, onyń saldarynan 224 eldi meken, 17,603 turǵyn úıgezaqym keldi. Barlyq zaqym kelgen shekken ǵımarattarǵa tehnıkalyq tekserý júrgizildi. Onyń qorytyndysy boıynsha 9,156 úı jóndeýden ótkizildi jáne 8,447 úı qalpyna keltirýge jaramaı qaldy. Osylaısha naryqtan 5,767 úı men páter satyp alyndy. Sonymen qatar 2,680 jańa úıdiń qurylysy bastaldy. Jańa úılerdi salý barysynda tasqynnyń aldyn alý maqsatynda jergilikti jerdiń relefteri men landshafty eskerildi. Búginde 2,576 úıdiń qurylysy aıaqtaldy. Qurylys jumystary mamyr aıynyń sońynda bastalyp, 4 aı ishinde bitti», - dedi Ónerkásip jáne qurylys mınıstri Qanat Sharlapaev Úkimet otyrysynda.
Aıta ketsek, qurylys jumystaryna tsıfrlyq quraldar arqyly kúndelikti monıtorıng júrgizý úshin atalǵan mınıstrlik janynda ahýaldyq ortalyq quryldy.
«Sonymen qatar, qurylys jumystarynyń barysy men sapasyn baqylaý úshin ár óńirdegi qurylys alańdaryna mınıstrliktiń jáne sý tasqynynan zardap shekpegen óńirlerdiń qyzmetkerleri issaparǵa jiberildi. Eńbek jáne halyqty áleýmettik qorǵaý mınıstrliginiń «Áleýmettik kómek» aqparattyq júıesi zalaldy óteý boıynsha ótinishterdi qabyldaý jáne uıymdastyrýǵa úles qosty. Tsıfrlyq damý mınıstrligi mobıldik qosymshalar arqyly zalaldy óteý ótinishin berýdi qysqa ýaqytta uıymdastyryp, tıisti qujattar bolmaǵan jaǵdaıdyń ózinde ótinish berý múmkindigi qarastyryldy», - deıdi vedomstvo basshysy.