Kóktemgi egis naýqanyn qarjylandyrý bıyl 1 jeltoqsanda bastalady
«Dándi daqyldy saqtaý máselesin erekshe nazarǵa alý qajet. Sonymen qatar fıtosanıtarııalyq qyzmet astyq sapasyna qatań baqylaý júrgizýi tıis. Sol sııaqty tuqym qoryn 100% qamtamasyz etý qajet. Kólik mınıstrligi «Qazaqstan temir joly» kompanııasymen birge egindi úzdiksiz tasymaldy uıymdastyryp, vagondarmen qamtamasyz etýdiń naqty kestesin bekitsin. Saýda jáne ıntegratsııa mınıstrligi Aýyl sharýashylyǵy mınıstrligimen birlesip, aýyl sharýashylyǵy ónimderin jetkizip, ótkizýdi qamtamasyz etýge tıis», - dedi Oljas Bektenov Úkimet otyrysynda.
Sondaı-aq, Oljas Bektenov otandyq aýyl sharýashylyǵy ónimderiniń eksport kólemin ulǵaıtý máselesin pysyqtaýdy júktedi.
«Óńir ákimdikteri kelesi jyly qoldanylatyn mıneraldy tyńaıtqyshtardyń kólemin 1,9 mln tonnaǵa deıin jetkizýi qajet. Ónerkásip jáne qurylys mınıstrligi otandyq óndirýshilermen birge dıqandar úshin tyńaıtqyshtyń qajetti kólemin shyǵarýǵa aldyn ala qamdanýy kerek. Óz kezeginde óńir ákimdikteri jetkizý sharttaryna ýaqytyly qol qoıyp, qoımalarda tyńaıtqyshtardyń qajetti qoryn qamtamasyz etsin. Aýyl sharýashylyǵy mınıstrligi «Báıterek» holdıngimen birlesip 1 jeltoqsannan bastap 2025 jyldyń kóktemgi egis jáne egin egý jumystaryn erte qarjylandyrýdy qolǵa alsyn», - deıdi ol.
Buǵan deıin Úkimet basshysy bıyl aýyl sharýashylyǵy salasyna rekordtyq kólemde (580 mlrd teńge) qarjy bólingenin aıtqan edi. Al keler jyly qarjylandyrý kólemin 700 mlrd teńgege deıin jetkizý josparlanyp otyr.