Kóktemde telefon IMEI-kodtaryn tirkeýdiń erejesi ázirlenedi - Dáýren Abaev

ASTANA. QazAqparat - QR Aqparat jáne kommýnıkatsııalar mınıstri Dáýren Abaev óziniń Facebook-tegi paraqshasynda uıaly telefondardyń IMEI-kodtaryn tirkeý boıynsha birqatar máselelerge túsinik berdi, dep habarlaıdy QazAqparat.

Onyń sózine qaraǵanda, tirkeý rásimderin ázirlip jatqan jumys toby quryldy. Mamyrdyń aıaǵyna deıin erejeler daıarlanyp,  eń qoljetimdi túrde azamattarǵa túsindiriledi. Ekinshiden, vedomstvo basshysy turǵylyqty jeri boıynsha tirkeý tájirıbesin eskerip, osy rette bul baǵyttaǵy rásimder barynsha jeńil bolatynyn jáne adamdardyń kezekke turý is-qımyldaryna jol bermeıtinin atap ótti.

Sonymen qatar D. Abaev, bul baǵytta IMEI-kodtar bazasyn qurýda halyqaralyq ońtaıly tájirıbe eskeriletinin jetkizdi. Atap aıtqanda, Ulybrıtanııa, Túrkııa, Ázerbaıjan, sondaı-aq ózge de elderdiń ozyq tájirıbesi  nazarǵa alynbaq.

Mınıstrdiń aıtýynsha, atalǵan júıeni iske qosý arqyly telefon urlyǵy aıtarlyqtaı azaıady dep kútilýde. Máselen, jábir kórýshi polıtsııaǵa shaǵymdanǵannan keıin, urlanǵan telefon birden buǵattalady. Іs júzinde telefon urlyǵy esh paıdasyz áreket bolyp qalady.

«ІІM derekterine súıensek, búginde elimizde jyl saıyn 60 myńǵa tarta telefon urlyǵy jasalady, al qurylǵylardy qaıtarý 5 paıyzdan kemdeý kórsetkishti quraıdy. Sonymen qatar telefon urlyǵynyń zardabyn kóp jaǵdaılarda bizdiń balalar tartyp jatady. Endi balalardyń qylmyskerlerdiń áreketinen qaýipsiz etý úshin qajetti tetik engiziledi»,-dedi D. Abaev.