Kóktemde egilgen orman kóshetteriniń 56,4%-y ósý qabiletin saqtap qalǵan

<p>PAVLODAR. KAZINFORM - Ertis-Baıan óńiriniń memlekettik orman qorynda aǵash otyrǵyzý jumystary aıaqtaldy. Jergilikti orman qorǵaý mekemelerimen jalpy aýmaǵy 1,2 myń gektardan asatyn aýmaqqa 6,8 mln kóshet otyrǵyzylǵan.</p>

Óńirlik jer qoınaýyn paıdalaný, qorshaǵan orta jáne sý resýrstary basqarmasy bıyl kóktemde egilgen aǵash kóshetteriniń jersiný, ıaǵnı ósý qabiletin saqtap qalý kórsetkishi ótken jyldarmen salystyrǵanda edáýir artyq ekenin atap ótti.

- Pavlodar oblysy ákimdigine qarasty orman qorǵaý mekemeleriniń aýmaǵynda 6,8 mıllıon dana eki jyldyq qaraǵaı kóshetteri otyrǵyzyldy. Olardyń jalpy aýdany 1,2 myń gektardan asady. Ormandardy molyqtyrýdyń bekitilgen Keshendi josparyna sáıkes otyrǵyzý kólemi tolyq ıgerildi. Aıta ketý kerek, orman-mádenı jumystardyń bir bóligi, shamamen 25%-y memorandým sheńberinde Eýrazııalyq top kásiporyndarynyń qarjylandyrý esebinen júzege asyryldy. Júrgizilgen túgendeý qorytyndysy boıynsha kóktemgi ekpelerdiń jersiný paıyzy 56,4% qurady, bul ótken jyldardaǵy kórsetkishterden edáýir asyp tústi. Orman kúzeti otyrǵyzylǵan kóshetterdi tıisti kútimmen jáne qorǵaýmen qamtamasyz etedi,-dep habarlady basqarma basshysy Saǵyn Tóleýtaev.

Búginde oblys ákimdigine qarasty Pavlodar, Úrlitúp, Maksım-Gorkıı orman qorǵaý mekemelerine jalpy aýmaǵy 127,5 myń gektar qaraıdy. Olardyń 89,8 myń gektary ormanmen kómkerilgen. 

Orman sharýashylyqtary keler jyly 1400 ga alańda 8,5 mln dana kóleminde orman daqyldaryn otyrǵyzýdy josparlap otyr.

Eske sala keteıik, Pavlodardaǵy orman sharýashylyqtaryn tehnıkamen qamtýǵa úsh jylda 1,6 mlrd teńge jumsalǵan.

Al «Ertis ormany» rezervatynda aǵash urlyǵy 97 paıyzǵa azaıǵan.