Kóktem mezgilinde adam aǵzasyna qandaı dárýmender qajet

ALMATY. QazAqparat – Kóktem mezgilinde adam aǵzasy túrli dárýmendi qajet etedi. Almaty qalalyq №16 emhananyń endokrınologi Natalıa Hegaı aǵzadaǵy dárýmen tapshylyǵyn qalaı anyqtaý qajettigin aıtty, dep habarlaıdy QazAqparat tilshisi.

«Túrli patologııa men aýrýlardyń saldarynan adam aǵzasynda dárýmen tapshylyǵy bolýy múmkin. Sondaı-aq, sýyq tıip, aspırın qabyldaǵanda S dárýmeniniń aǵzadan shyǵý jyldamdyǵy 3 ese artady. Jalpy, kóktem mezgilinde adam aǵzasy S, D, A, E, V1, V2, RR dárýmenderin qajet etedi. Bul rette dárihanada satylatyn dárýmenderdi óz betinshe qabyldaýǵa bolmaıdy, ol úshin mindetti túrde dárigermen keńesý kerek. Kóktemde aǵzada dárýmen tapshylyǵyn boldyrmas úshin teńiz balyǵy, keptirilgen jemis, jańǵaqtar óte paıdaly. Kókónisti umytpaý kerek, bul rette qyryqqabat, sábiz paıdaly», - dedi dáriger.

Onyń aıtýynsha, aǵzadaǵy dárýmenniń tapshylyǵyn myna belgiler arqyly anyqtaýǵa bolady:

- Apatııa jáne buryn unatqan zattar men áreketterge qyzyǵýshylyqty joǵaltý;

- Jıi sýyq tııý jáne murynnan sý aǵý;

- Bir nemese birneshe sozylmaly aýrýdyń órshýi;

- Uıyqtaý protsesiniń qıyndaýy, al tańerteń oıanýdyń odan da qıyn bolýy;

- Túnde saǵat 2:30-dan 3:30-ǵa deıingi aralyqta jıi oıaný;

- Teride bezeýdiń paıda bolýy nemese teriniń shamadan tys qurǵaýy;

- Shashtyń túsýi jáne tyrnaqtyń synǵyshtyǵy;

- Іsh qatý, ishtiń aýyrýy jáne gastrıt túrinde asqazan-ishek joldary buzylýynyń paıda bolýy;

- Qyzyl ıektiń kenetten qanaýy;

- Zeıinniń bolmaýy;

- Turaqty bas aýrýy;

- Qulaqtyń shyńyldaýy jáne azdap bas aınalý.

«Adam aǵzasynda bul tizimdegi eki belginiń bolýy – progressıvti kóktemgi dárýmen tapshylyǵymen jedel kúresý qajet ekenin bildiredi. Dárýmen tapshylyǵynyń aldyn alýdyń negizgi qaǵıdasy – durys tamaqtaný. Sonymen qatar, dárýmenderdiń jetispeýshiligi kezinde taza aýada jıi serýendep, turaqty túrde sporttyq jattyǵýlar jasaý kómektesedi», - dedi Natalıa Hegaı.