«Kóktem-2023»: sý tasqyny kezeńindegi tótenshe jaǵdaılardy joıý is-sharalary pysyqtaldy

ASTANA. QazAqparat - Eki kún ishinde respýblıka aýmaǵynda «Kóktem-2023» Respýblıkalyq komandalyq-shtabtyq oqý-jattyǵýy sheńberinde sý tasqyny kezeńindegi tótenshe jaǵdaılardyń aldyn alý jáne joıý jónindegi is-qımyldardy pysyqtaý boıynsha is-sharalar ótkizildi, dep habarlaıdy QR TJM baspasóz qyzmeti.

Oqý-jattyǵý sý tasqyny kezeńi jaǵdaıynda azamattyq qorǵaý organdarynyń laýazymdy tulǵalary men qurama jetekshileriniń avarııalyq-qutqarý jáne shuǵyl jumystardy uıymdastyrý jáne júrgizý boıynsha tájirıbelik daǵdylaryn jetildirý maqsatynda ótkizildi.

Barlyq óńirlerde tótenshe jaǵdaılar jónindegi komıssııanyń, azamattyq qorǵaý qyzmetteriniń basshylarynyń otyrystary ótkizildi; sý tasqyny kezeńinde tótenshe jaǵdaılardy joıý jónindegi praktıkalyq is-sharalardy ázirleı otyryp, avarııalyq-qutqarý qyzmetteri quramalarynyń jáne áskerı qolbasshylyq bólimsheleriniń daıyndyǵyna sholý jasalandy.

Oqý-jattyǵýdyń ekinshi kúni, 3 naýryzda «Kóktem-2023» respýblıkalyq komandalyq-shtabtyq oqý-jattyǵýy aıasynda profılaktıkalyq is-sharalardy júzege asyrýmen tájirıbelik sabaqtar jalǵasty.

TJ jónindegi vıtse-mınıstr Marat Kúldikov Qaraǵandy qalasynda sý tasqynyna qarsy júrgizilip jatqan jumystarǵa tekserý júrgizdi.

Oqý-jattyǵý sońynda respýblıkalyq qyzmetter men óńirlerdiń sý tasqynyna daıyndyǵy jáne oqý-jattyǵý barysynda atqarylǵan is-sharalar týraly tyńdaldy.

TJ jónindegi Vıtse-mınıstr barlyq atqarýshy organdarǵa sý tasqynyna qarsy is-sharalardy júrgizýdi kúsheıtýdi, turǵyn úı qoryn tasqyn jáne erigen jańbyr sýlarynyń qaýipti áserinen qorǵaý, gıdrotehnıkalyq qurylystardyń qaýipsizdigin, sý ótkizý qurylystarynyń daıyndyǵyn qamtamasyz etý jónindegi sharalarǵa erekshe nazar aýdarýdy tapsyrdy.

Sondaı-aq Marat Kúldikov sý qoımalarynan aǵyzýdy tıimdi retteýdi, sý tasqyny qaýpi tóngen jaǵdaıda jaǵdaıdy baqylaýdy jáne boljaýdy tapsyrdy.

Oqý-jattyǵý qorytyndysy boıynsha aqparat QR Premer-Mınıstriniń birinshi orynbasaryna jiberiledi.