Kóktaıǵaqtyń aldyn alý: Astanada joldar men trotýarlarǵa 6 myń tonnadan astam reagent sebildi

<p>ASTANA. KAZINFORM &ndash; Astanada tolassyz jaýǵan qardyń sońy jańbyrǵa ulasyp, aýa raıy kúrt ózgerdi. Osyǵan baılanysty qalanyń memlekettik qyzmetteri táýlik boıy kúsheıtilgen rejımde jumys istep jatyr. Bıyl aqpan aıynyń basynan beri trotýarlar men joldarǵa 6 myń tonnadan astam qum-tuz, tehnıkalyq tuz jáne basqa da reagentter sebildi. Sonymen qatar, jaıaý júrginshiler jolyndaǵy muz da tazartylyp jatyr, dep habarlaıdy elorda ákimdiginiń resmı saıty.</p>

Tańerteńnen bastap qalany qardan tazalaý jumysyna 2,4 myńnan astam jol jumysshy men 1,5 myńǵa jýyq arnaıy tehnıka jumyldyryldy. 

«Qazgıdromet» málimetinshe, 1-12 aqpan aralyǵynda 22 mm den astam jaýyn-shashyn jaýdy, bul aılyq normadan 5 mm-ge artyq. Eki aptaǵa jýyq ýaqytta kommýnaldyq qyzmetter 1,1 mıllıon tekshe metrden astam qar shyǵardy.

Ótken túnde kommýnaldyq qyzmetter elordadan 38 myń tekshe metrge jýyq qar shyǵardy. Bul 2,7 myńnan astam aýyr júk kóligine teń.

Foto: Astana qalasy ákimdigi

Qys mezgiliniń basynan beri bas-aıaǵy 325,7 myń reıs arqyly qala syrtyndaǵy polıgondarǵa 4,4 mıllıon tekshe metrden astam qar shyǵaryldy.