Kókshetaýlyqtar Naýryz meıramyn 7 kún boıy toılaıdy

KÓKShETAÝ. QazAqparat - Kókshetaýlyqtardy bıylǵy Naýryzda úlken mereke kútip otyr. Naýryz meıramy 7 kún boıy «Uly dalanyń jeti qyry» maqalasyndaǵy ár kún bir sımvolynyń negizinde ótpekshi, dep habarlaıdy QazAqparat tilshisi qala ákiminiń baspasóz qyzmetine silteme jasap.

Ákimdiktiń málimetine súıensek, naýryzdyń 15-de «Kórisý» taqyrybymen «Kókshetaýǵa kóktem keldi» telejobasy ótedi.

«18-20 naýryz aralyǵynda «Naýryz meıramy», «Úkili sáýkele» qyz jasaýyn daıarlaý saltyn kórsetý, «Besikke salý» sııaqty aktsııalar uıymdastyrylady.

Naýryz meıramyn toılaýdyń sharyqtaý shegi «Abylaı han» jáne «Táýelsizdik» alańdarynda 30 myń qala turǵyny men qonaqtarynyń qatysýymen ótetin halyqtyń serýendeýine jalǵasady. Mundaı sharalar Krasnoıar jáne Stantsıonnyı kentterinde de jalǵasyn taýyp, teatrlandyrylǵan qoıylymdar men kontserttik baǵdarlamalarǵa ulasady.

Naýryzdyń 21-de ortalyq alańda kıiz úı qalashyǵy ornatylyp, árqaısysynda áleýmettik jaǵdaıy tómen jandarǵa qaıyrymdylyq as beriledi. Qala turǵyndary men qonaqtaryna da aýyz tııý usynady. Ornatylǵan kıiz úıler shartty túrde jeti aýylǵa bólinedi. Sahna da eki deńgeıden turatyn bolady, alańdarda «Altybaqan», «Qyzǵaldaq», «Otbasy» pnevmopishinderi qoıylady.

Kórermender «Bata berý», «Atqa mingizý», balanyń týǵanynan bastap otbasyn qurý kezine deıingi salt-dástúrleri sııaqty kóshpendi halyqtyń dástúrler kórsetiliminiń kýágeri bolady.

Merekeniń tuzdyǵy 1 myńnan astam kóshet, 500 keli alma, 1 tonna «Naýryz kóje», 1 tonnadan astam baýyrsaq bolmaq, sondaı-aq, balalar úshin 5 myńnan astam qurttan jasalǵan syılyq úlestiriledi», deıdi qala ákiminiń baspasóz qyzmetindegiler.

Uıymdastyrýshylar aýqymdy teatrlandyrylǵan qoıylymdar ázirleýde, merekeniń máni men sáni kóptegen obrazdar men Naýryz sımvoldary arqyly kórsetilmek: «Qydyr ata», «Umaı ana», «Búrkitshi», qazaqtyń Alabaı, Tazy tuqymdarynyń qatysýymen. «Táýelsizdik» alańynda ulttyq sport oıyndarynan jarys uıymdastyrylady, júlde qory da qomaqty.

Jastar jylynyń sımvoly retinde belsendi jastardyń qatysýymen qazaq halqynyń salt - dástúrleriniń kórsetilimi men aýqymdy fleshmob uıymdastyrylady.

«Merekelik shara Aqmola oblysynyń shyǵarmashylyq ujymy, Kókshetaý qalasynyń mekemeler, oqý oryndary jáne uıymdarynyń kontserttik baǵdarlamasyna jalǵasady. Іs-sharanyń sońynda aspanǵa júzdegen sharlar ushyrylady. Bul kúnderi qalanyń barlyq mekemelerinde Naýryz meıramyn toılaý sharalary ótetin bolady», dep tolyqtyrdy vedomstvodan.