Kókshetaýlyq kópbalaly ana saılaýda óz tańdaýyn jasady

KÓKShETAÝ. QazAqparat - Kókshetaýlyq kópbalaly ana, «Ana úıi» resýrstyq ortalyǵynyń úılestirýshisi, «Demeý senim» qoǵamdyq qorynyń jetekshisi Quralaı Jumabekova saılaýda daýys berdi, dep habarlaıdy QazAqparat tilshisi.

Ol ózi ornalasqan saılaý ýchaskesine otbasymen birge baryp, azamattyq belsendilikterin tanytty.

«Men búgin otbasymmen birge, elimizdiń keleshegi men gúldenýi úshin daýys berdim. Ádildik ornatamyz desek, Jańa Qazaqstandy birlesip qurýymyz kerek. Sol sebepti, búgingi saıası naýqannan eshqaısymyz qalys qalmaýǵa tıispiz dep oılaımyn. Óıtkeni, búgingi tańda memleket tarapynan áleýmettik máselelerge, onyń ishinde kópbalaly otbasylardyń áleýmettik-turmystyq jaǵdaıyna jiti kóńil bólinýde. Bul bizderdi qýantady, árıne. Kópbalaly ana retinde balalarymyzdyń keleshegi jarqyn bolsyn dep tileımin. Sol úshin ózim jáne kámelettik jasqa tolǵan balalarymdy alyp, ózim tirkelgen saılaý ýchaskesine kelip daýys berdim», – deıdi kópbalaly ana Quralaı Jumabekova.

Aıta ketsek, Kókshetaýlyq «Kúmis alqa» ıegeri Quralaı Jumabekova týǵan balalaryna ǵana emes, ózgeniń balalaryna da jeterlikteı analyq mahabbatqa toly úlken júrek ıesi. Alty balany dúnıege ákelip, taǵy alty balany baýyryna basqan ol qoǵamdyq jumystarǵa da belsendi aralasýda.

Búgingi kúni ol jetekshilik etip otyrǵan «Ana úıi» resýrstyq ortalyǵy men «Demeý senim» qoǵamdyq qory turmystyq zorlyq-zombylyqqa ushyraǵan áıelderge quqyqtyq jáne psıhologııalyq qoldaý kórsetýde.