Kókshetaýlyq kásiporyn jylyna 800 kombaın qurastyrmaqshy
Osy baǵytta jobaǵa 7,5 mıllıard teńgeden astam ınvestıtsııa salynǵan, dep habarlaıdy QazAqparat tilshisi oblystyq ishki saıasat basqarmasyna silteme jasap.
Vedomstvonyń málimetinshe, búgingi tańda kásiporynda «Vektor» jáne «Acros» tárizdi alymdylyǵy joǵary kombaındar shyǵarylady. Sonymen birge, shalǵy, astyq tıegish sııaqty aýyl sharýashylyǵy tehnıkalary qurastyrylady.
«Kompanııa jańa ekinshi tsehtyń qurylysy men óndiristi jańǵyrtý esebinen óndiris kólemin ulǵaıtyp otyr. Kombaın qurastyratyn qosymsha taǵy jeti beket uıymdastyryldy. Budan bólek, bizde boıap keptiretin jańa keshen jumys isteıdi. Bul bizge birinshi kezekte kombaınnyń barlyq bólshegin aýa raıyna qaramastan úzdiksiz boıaýǵa múmkindik beredi. Ekinshiden ýaqyt únemdep, qurastyrý jumystaryn jedeldetedi», – deıdi kásiporyn basshysynyń óndiris boıynsha orynbasary Vıtalıı Kýn.
Aıta ketsek, jyl basynan beri kásiporynda 440 birlik «Vektor» jáne «Acros» tárizdi alymdylyǵy joǵary kombaındar qurastyrylyp shyǵaryldy. Daıyn ónimdi elimizdiń astyqty oblystary satyp alady. Mundaǵy bir kombaınnyń quny 42-45 mıllıon teńgeni quraıdy.
Jalpy, Aqmola oblysynda altyn óndiretin, kirpish shyǵaratyn, aýyl sharýashylyǵy jáne kommýnaldyq tehnıkalardy qurastyratyn, avıtsııa jáne medıtsına ónimderin shyǵaratyn 15 kásiporyn bar, onda barlyǵy 20 adam eńbek etedi.