Kókshetaýlyq dárigerler KVI-men qalaı kúresip jatyr

KÓKShETAÝ. QazAqparat - Kókshetaýdaǵy qalalyq emhananyń dárigerleri men medbıkeleri óńirde alǵashqylardyń biri bolyp, koronavırýstyq ınfektsııamen kúresýde belsendilik tanytty. Búgingi tańda olar osy jaman dertti aldyn alýda aldyńǵy qatardan kórinýde. Bul týraly Kókshetaý qalalyq emhanasynyń bas dárigeri Ǵalııa Sabataeva málim etti, dep habarlaıdy QazAqparat tilshisi.

Onyń aıtýynsha, búginde medıtsınalyq mekeme tirkelgen halyqtyń 91 myńyna kómek kórsetedi.

«Bizdiń dárigerler men medbıkeler koronavırýstyq ınfektsııamen kúresýde aldyńǵy qatardan kórindi. Aýyrǵan turǵyndar aldymen bizge júginedi. Emhanada 4 súzgi kabıneti bar, onda 10 dárigerlik,feldsherlik, meıirgerlik brıgada jumys isteıdi. Oǵan 18 dáriger men feldsher, 34 medbıke jumyldyrylǵan. 2020 jyly súzgiden 6 694 adam ótti. Ótken jyly bul kórsetkish 19 576 adamdy qurady. Osy jyldyń qańtar aıynda 2989 ótinish kelip tústi», - dedi Ǵalııa Sabataeva.

Bas dáriger atap ótkendeı, koronavırýstyq ınfektsııanyń taralýyn aldyn alý sharalary ózge medıtsınalyq baǵyttar boıynsha qyzmet kórsetý sapasyna áser etpegen. Sondaı-aq, ýchaskelik dárigerler men beıindi mamandardyń josparly qabyldaýlary ótkizilip turady. Ótken jyly 400 myńnan astam naýqasty qabyldasaq, onyń 93 898-i úı jaǵdaıynda emdeldi.

«Bizdiń mekemeniń jabdyqtalýy medıtsınalyq kómektiń barlyq túrlerin, sonyń ishinde mamandandyrylǵan jáne joǵary tehnologııalyq kómek kórsetýge múmkindik beredi. Aýrýlardy erte dıagnostıkalaý boıynsha profılaktıkalyq skrınıngtik tekserýler jalǵasýda. Ótken jyly 32 myńnan astam adam qaraldy. Ókpe aýrýlaryn erte anyqtaý úshin halyqty flıýorografııalyq tekserý úzilmedi. 2021 jyly biz 61 353 adamdy qamtydyq», - dep qosty bas dáriger.

Emhana mamandarymen emdeýge jatqyzý aldynda irikteý, tekserý jáne táýliktik statsıonarlar men kúndizgi statsıonarlarǵa josparly emdeýge jatqyzýǵa jiberý júrgiziledi. Ótken jyly josparly túrde 4174 naýqas aýrýhanaǵa jatqyzyldy.

Júkti áıelderdi medıtsınalyq baqylaýda irkilis bolmady, qabyldaýlar, patronajdar júrgizildi. 2021 jyly barlyǵy 1229 júkti áıel baıqaldy. Ótken jyly medıtsına qyzmetkerleriniń baqylaýynyń arqasynda 1504 áıel bosandy, onyń ishinde 12 egiz sábı dúnıege keldi.

Negizgi naýqastar-balalar. Profılaktıkalyq tekserýmen 14 440 bala qamtyldy. 14 juqpaly aýrý men jas boıynsha balalarǵa ımmýnoprofılaktıka júrgizildi. Vaktsınatsııamen qamtý tıisti kontıngenttiń 93 paıyzyn qurady. Búgingi tańda emhananyń altyn qory- ol onyń ujymy deýge bolady.

«Bizdiń qatarymyzda ártúrli mamandyqtaǵy 102-den astam dáriger, úlken kásibı jáne ómirlik tájirıbesi bar 424 orta medıtsınalyq qyzmetker eńbek etedi. Jany men júregi úlken mamandarymyzdyń kúndelikti ıgi eńbeginiń kólemin ólshep, baǵalaý múmkin emes», - dep túıindedi Ǵalııa Sabataeva.