Kókshetaýlyq áje on bes balasynan 46 nemere, shóbere jáne nemene kórgen

KÓKShETAÝ. QazAqparat - Kókshetaýlyq altyn qursaq ana Gúlbarshyn Kákenova búginde 30 nemere, 15 shóbere jáne 1 nemene súıip otyr, dep habarlaıdy QazAqparat tilshisi Aqmola oblysynyń ishki saıasat basqarmasyna silteme jasap.

Eki márte Batyr Ana, eńbek ardageri, tyl eńbekkeri Gúlbarshyn apa burynǵy Kókshetaý oblysynyń Rýzaev aýdanynda dúnıege kelipti.

83 jastaǵy altyn qursaq ana 15 balany dúnıege ákelgen. Qazirgi kúni solardan 30 nemere, 15 shóbere jáne 1 nemene súıip otyr.

Halyqaralyq áıelder kúnine oraı Aqmola oblysy ákiminiń orynbasary Qanat Ydyrysov «Altyn alqa» ıegeri, kópbalaly ananyń shańyraǵynda bolyp, merekemen quttyqtady.

«Oblys basshysynyń atynan Sizdi kóktem merekesimen quttyqtaımyn! Qasyńyzda balalaryńyz, nemerelerińiz, shóberelerińizdiń bolýy bul shynymen naǵyz baqyt», - dedi oblys ákiminiń orynbasary.

Merekelik dastarhan basynda Gúlbarshyn áje balalary men nemerlerin elimizdiń laıyqty azamaty etip tárbıelep, ósirgenin aıtyp berdi.

Keıýananyń aıtýynsha, ol erte segiz jasynan bastap eńbekke aralasqan. Soǵys ýaqytynda alqapta eresekterge kómektesken.

Keıin balaly ana bolǵan kezinde de kolhozda eńbek etken. Ol eńbekten eshqashan da qol úzbegen.

Gúlbarshyn Kákenova bastapqy da óziniń ómirlik serigimen birge Zerendi aýdanyna qarasty Barataı aýylynda turǵan. Balalary da sonda erjetken. Keıin, ıaǵnı osydan 20 jyl buryn otaǵasynan aıyrylǵan qart ana búginde balalarynyń, nemere-shóbereleriniń qyzyqtaryn kórip, baqytty ǵumyr keshýde.