Kókshetaýlyqtyń 12 mln teńge aqshasyn jymqyrǵan dropper 3,5 jylǵa sottaldy

<p>KÓKShETAÝ. KAZINFORM &ndash; Kókshetaý turǵynynyń esepshotynan 12 mln teńgeden astam aqsha jymqyrǵan dropper 3,5 jylǵa bas bostandyǵynan aıyryldy.</p>

Aqmola oblysy PD baspasóz qyzmetiniń málimetinshe, sottalǵan adam Kókshetaý qalasyna ótken jyldyń jazynda Máskeýden kelgen. Oǵan osynda mobıldi qosymshanyń kómegimen bankomattar arqyly qolma-qol aqshaǵa sheship alý arqyly ońaı tabys tabatyn jumys usynylǵan.

Sottalýshy óz áreketteriniń zańsyz ekenin bilmegenin aıtyp aqtalmaq boldy. Jumys berýshi oǵan telegrammda krıptovalıýta arbıtrajymen aınalysyp, kartadan aqsha alý kerek ekenin túsindirgen. Alaıda, tergeýshiler anyqtaǵandaı, er adam ınternettegi alaıaqtyqtyń qylmystyq shemasyna qatysyp, dropper rólin atqarǵan. 

Osylaısha, alaıaqtar Kókshetaý qalasynyń turǵynyna 12 mıllıon 229 myń teńge kóleminde materıaldyq shyǵyn keltirgen. Al sottalǵan adam banktomattan aqshany qolma-qol sheship alyp, «jumys berýshige» aýdaryp otyrǵan. Sottalýshynyń ózi qylmystyq shemada 360 000 teńge «tabys» tapqan. 

Sotqa onyń kináli ekenin anyqtaý úshin tergeýshiler keltirgen dáleldemeler jetkilikti boldy. 

«Kókshetaý qalalyq sotynyń úkimimen sottalýshyǵa ortasha qaýipsizdik qylmystyq-atqarý júıesi mekemesinde jazasyn óteı otyryp, 3 jyl 6 aı bas bostandyǵynan aıyrý túrindegi jaza taǵaıyndaldy», - dedi vedomstvodan. 

Aıta ketsek, budan buryn ınternet alaıaqtary aqmolalyqtyń depozıttegi 5,5 mln teńgesin sheship alǵanyn jazǵan edik.