Kókshetaýdyń 195 jyldyǵy qalaı toılanady
Aqmola oblystyq ishki saıasat basqarmasynyń málimetinshe, maýsymnyń 17-sinen bastap qala kúniniń onkúndigi bastalyp, kásiporyn jáne uıymdardyń qyzmetkerlerimen «súıikti qalaǵa 195 tilek» chelledji ótýde. Sonymen qatar, «Men Kókshetaýdy júregimmen tyńdaımyn» taqyrybymen sándik-qoldanbaly óner sheberleriniń kórmesi, «Kóksheniń baqytty perzentteri» úı aýlalary klýbtarynyń ashyq esik kúni, «Sulý Kóksheme arnaımyn» shyǵarmashylyq kontserti, «Znatokı rodnogo goroda» kvest-oıyn, «Kókshe story: gúldene ber Kókshem, Abylaıdyń armany! kitap kórme-krýızy, Kókshetaý ómirinen sketch tárizdi sharalar ótkizilýde.
Toıdyń tuzdyǵy maýsymnyń 28-29 kúnderine qarastyrylyp otyr. Maýsymnyń 28-inde «Kókshe CITY» kompanııasynda kishi qaptar shyǵaratyn tseh iske qosylady jáne «Zerek» jańa balabaqshasy ashylady. Sol kúni «Arqanyń kerbez sulý Kókshetaýym» atty saltanatty shara ótedi. Onda qala turǵyndary men qonaqtary jerlesteri, tanymal ánshi jáne sazger Nurlan Álimjanovtyń kontsertin tamashalaıdy. Aqmola oblystyq orys drama teatrynda kórermenderge tanymal dramatýrg Raqymjan Otarbaevtyń «Sultan Beıbars» spektakliniń premerasy usynylady.
Merekeniń ekinshi kúni bıiktigi 11 metr «dombyra» kompozıtsııasy ashylady. Eskertkishtiń avtory jergilikti sýretshi Manarbek Býrmaǵanov. Al, «Qulager» atshabarynda sporttyń 12-i túrinen oblystyq spartakıada josparlanǵan. Onda uzyndyǵy «Quraq kórpe Fest» festıvali ótip, 16 shaqyrym ulttyq tigin ónimderi usynylady.
Al, tústen keıin «Kókshetaý - baqyty otbasy mekeni» sharasynda «Nurly jer» baǵdarlamasy boıynsha salynǵan turǵyn úılerden jańa páterdiń kilti tapsyrylady. Qalanyń kishkentaı turǵyndaryna «Samuryq-Qazyna» AQ fýtbol jáne vorkýt alańdaryn syıǵa tartady. «Táýelsizdik» alańynda jastar arasynda «Tiri shahmattan» týrnır ótkiziledi. Keshkisin qala turǵyndary men qonaqtary otandyq estrada juldyzdarynyń «Kórkińe, Kókshem, ǵashyqpyn!» atty kontserttik baǵdarlamasyn tamashalaıdy.
Merekelik shara túngi ot shashýmen óz máresine jetedi.