Kókshetaýdaǵy Rım-Katolık shirkeýi jaıly ne bilemiz

KÓKShETAÝ. QazAqparat – Kókshetaýdaǵy Áýlıe Antonıı Padýanskııdiń Rım-Katolık prıhodynda kelýshiler osydan 74 jyl buryn jasalǵan 14 dybysty pnevmatıkalyq organnan shyǵatyn áýendi estı alady. Bul týraly QazAqparat tilshisine atalmysh ǵıbadathananyń dinı qyzmetshisi Voıcheh Skorýpa aıtyp berdi.

Voıcheh Skorýpanyń aıtýynsha, onyń ózi bir jyl buryn Kókshetaýǵa Polshadan kelgen.

«Kostel» sóziniń qaıdan shyqqanyn bilmeımin, biz ózimizdi Rım-Katolık shirkeýi dep ataımyz. Osy jerdiń qamqorshysy - Antonıı Padýanskıı. Bizdiń prıhodtyń qurylysy 1995 jyly bastaldy. Qaýymdastyq quryldy. Munda adamdar duǵa arqyly Qudaımen baılanysyp, lázzat alady», - deıdi dinı qyzmetshi.

Rım-Katolık prıhody Kókshetaýdaǵy eń ádemi nysandardyń biri sanalady jáne ózge ǵımarattardan gotıka stılimen erekshelenedi. Kez kelgen katolık shirkeýindegideı, onyń ortasynda bir jáne eki jaǵynda eki qurbandyq oshaǵy bar.

«Bireýinde Fatımskaıa Qudaı anasynyń músini tur. Ony 2001 jyly Qazaqstanǵa kelgen Rım Papasy Ioann Pavel II qasterlegen edi. Oń jaqta qasıetti syılar ornalasqan - bul eń mańyzdy oryn. Árıne, ózderińiz kórip otyrǵandaı, bul jerde kıiz úıdiń beınesi bar, ol biz tamasha el – Qazaqstanda turatynymyzdy bildiredi», - dep tolyqtyrdy Voıcheh Skorýpa.

Katolıkter ǵana dinı qyzmet kórsetý kezinde organdy qoldanady.

Shirkeýdiń dinı qyzmetshisiniń aıtýynsha, bul organ 1948 jyly jasalǵan. Keıin Poznan qalasyndaǵy (Polsha) Sent-Stanıslav Kostkanyń prıhodyna tartý etildi. Al 1999 jyly Kókshetaýǵa jetkizilip, osynda ornatyldy. Degenmen, ony ǵıbadathanada tek Qudaıǵa qulshylyq kezinde ǵana qoldanbaıdy. 2000 jyly osynda I.S.Bahtyń mýzyka festıvali de ótken eken.

«Bizdiń organıstimiz - monah áıel. Ol qyzmet kezinde osy organda oınaıdy. Bizdiń organ - óte eski, biraq dybysy keremet estiledi. Árıne, eski bolǵandyqtan jóndeýdi qajet etedi», - dedi Voıcheh Skorýpa.

Hramda ekran ornalasqan. Onda oryndalyp jatqan ánderdiń sózi kórsetiledi. Dinı rásimder keste boıynsha ótkiziledi. Árıne, prıhodshylar úshin belgili bir erejeler bar.

«Bul Qudaıdyń ǵıbadathanasy, qassıetti oryn. Sondyqtan munda kelgende kıim úlgisine erekshe mán beriledi. Bul negizgi ereje», - dedi Voıcheh Skorýpa.

Sonymen birge, ol Táýelsiz Qazaqstanda dinı erkindik baryn atap ótti.

«Biz tamasha el-Qazaqstanda turyp jatyrmyz. Bizdiń elde dinı erkindik bar, kez kelgen adam óz tańdaýy boıynsha meshitke nemese shirkeýge bara alady. Men ózim meshitte de, pravoslav shirkeýinde de bolyp kórdim. Biz ǵıbadathanaǵa kelgen adamdy bala nemese eresek dep bólmeımiz. ıAǵnı, duǵa etkisi kelgen adamǵa barlyq múmkindik bar», - dep qosty dinı qyzmetshi.

Osy rette, «Nelikten ózi shirkeýge keldi?» degen saýalǵa Voıcheh Skorýpa bylaı jaýap berdi: «Bul meniń tańdaýym. Bireý otbasyn qurýdy sheshedi, al men dinı qyzmetshi bolýdy jáne adamdarǵa qyzmet etýdi tańdadym. Ár adamnyń ómirinde tańdaý jasaıtyn sát bolady, sol kezde ol ózi qaı jolmen júretinin tańdaıdy...».