Kókshetaýdaǵy mektep-ınternatqa Abaı esimi berildi

KÓKShETAÝ. QazAqparat - Kókshetaýdaǵy daryndy balalarǵa arnalǵan №3 oblystyq mamandandyrylǵan mektep-ınternatyna halqymyzdyń uly aqyny Abaıdyń esimi berildi, dep habarlaıdy QazAqparat tilshisi.

Sharaǵa qatysqan aımaq basshysy Ermek Marjyqpaev quttyqtaý sóz sóılep, uly danyshpannyń mereıtoıy sheńberinde onyń shyǵarmashylyǵyn nasıhattaý jumystar keń aýqymda júrgizilip jatqandyǵyn atap ótti.

«Abaı Qunanbaevtyń 175 jyldyǵyna oraı óńirde bıyl myńnan astam is-shara uıymdastyryldy. Abaıdyń shyǵarmalary búgingi kúni de ózektiligin joǵaltqan joq. Babalarymyzǵa kórsetken qurmet retinde oblysymyzdyń eki mektebine Abaı jáne Ál-Farabıdiń esimderi berildi. Stepnogorsk qalasynyń tórt mektebi tarıhı tulǵalardyń esimderimen qaıta ataldy. Uly tulǵalarymyzdyń esimderi odan ári nasıhattala beredi», - dedi aımaq basshysy.

Shara barysynda jınalǵandar mektep janyndaǵy Abaı alleıasynda tal otyrǵyzdy.